पेट्रोलियम पदार्थको मूल्यवृद्धि विरुद्ध काठमाडौंमा विद्यार्थी संगठनहरूले गरे प्रदर्शन

काठमाडौं । पेट्रोलियम पदार्थको मूल्यवृद्धिविरुद्ध विभिन्न दलनिकट संयुक्त विद्यार्थी संगठनहरूले राजधानीको प्रदर्शनी मार्ग क्षेत्रमा राँके जुलुससहित प्रदर्शन गरेका छन् । प्रदर्शनकारीहरूले मूल्यवृद्धि तत्काल फिर्ता लिन माग गर्दै सरकारविरुद्ध नाराबाजी गरेका थिए ।

प्रदर्शनमा सहभागी विद्यार्थीहरूले बढ्दो महँगीका कारण आमनागरिक र विद्यार्थी समुदाय प्रत्यक्ष प्रभावित भएको भन्दै पेट्रोलियम पदार्थको मूल्य समायोजन गर्न सरकारलाई दबाब दिएका छन् । उनीहरूले मूल्यवृद्धि फिर्ता नगरे आन्दोलन थप सशक्त बनाउने चेतावनीसमेत दिएका छन् ।

यस्तै, प्रदर्शनका क्रममा विद्यार्थीहरूले शिक्षा क्षेत्रमा भइरहेको राजनीतिक हस्तक्षेपको विरोध गर्दै शिक्षामन्त्री सस्मित पोखरेल को राजीनामा माग गरेका छन् । उनीहरूको आरोप छ कि विश्वविद्यालयहरूमा अनावश्यक राजनीतिक प्रभाव बढ्दै गएकोले शैक्षिक वातावरण प्रभावित भएको छ ।

प्रदर्शनकारीहरूले “मूल्यवृद्धि फिर्ता गर”, “विश्वविद्यालयमा राजनीतिक हस्तक्षेप बन्द गर” र “विद्यार्थी संगठन खारेज गर्न पाइँदैन” जस्ता प्लेकार्ड बोकेका थिए । प्रदर्शनका कारण केही समय उक्त क्षेत्रमा सवारी आवागमन प्रभावित भएको थियो भने सुरक्षाका लागि उल्लेख्य मात्रामा प्रहरी परिचालन गरिएको थियो ।