विश्वकपमा दक्षिण कोरियाको शानदार जित, चेक रिपब्लिक २–१ ले पराजित

काठमाडौं । फिफा विश्वकप २०२६ अन्तर्गत समूह चरणको रोमाञ्चक खेलमा दक्षिण कोरियाले चेक रिपब्लिकलाई २–१ ले पराजित गर्दै महत्वपूर्ण तीन अंक जोडेको छ। मेक्सिकोको ग्वाडालजरा रंगशालामा सम्पन्न खेलमा कोरिया सुरुआतमा पछि परे पनि उत्कृष्ट पुनरागमन गर्दै जित निकाल्न सफल भयो।

खेल निकै प्रतिस्पर्धात्मक र तनावपूर्ण बनेको थियो। पहिलो हाफ गोलरहित बराबरीमा सकिएको खेलमा चेक रिपब्लिकले ५९ औं मिनेटमा अग्रता लिएको थियो। लादिस्लाभ क्रेज्कीले गरेको गोलसँगै चेक टोलीले खेलमा नियन्त्रण जमाउने प्रयास गरेको थियो। तर दक्षिण कोरियाले दबाब कायम राख्दै लगातार आक्रमण जारी राख्यो।

कोरियाको दबाब ६७ औं मिनेटमा सफल भयो। ह्वान इनबियोमले सुन्दर गोल गर्दै खेललाई १–१ को बराबरीमा ल्याए। बराबरीपछि थप उत्साहित बनेको कोरियाले खेलको ८० औं मिनेटमा निर्णायक गोल गर्न सफल भयो। ओयच ह्याङयुले गरेको गोलसँगै दक्षिण कोरिया २–१ ले अघि बढ्यो।

बाँकी समयमा चेक रिपब्लिकले बराबरी गोल फर्काउने प्रयास गरे पनि कोरियाली रक्षापंक्तिले बलियो प्रदर्शन गर्दै अग्रता जोगायो। अन्ततः दक्षिण कोरियाले संघर्षपूर्ण जित निकाल्दै विश्वकपको समूह चरणमा महत्वपूर्ण अंक बटुल्न सफल भयो।

यस जितसँगै दक्षिण कोरियाले समूह चरणमा आफ्नो सम्भावना बलियो बनाएको छ भने चेक रिपब्लिकले सुरुआती अग्रता जोगाउन नसक्दा निराश हुनुपरेको छ। प्रतियोगितामा अगाडि बढ्न दुवै टोलीका आगामी खेलहरू निर्णायक हुनेछन्। एजेन्सी