श्रम ऐन कार्यान्वयनको माग गर्दै प्रशिक्षार्थी चिकित्सक आन्दोलनमा

काठमाडौँ, जेठ ३० गते । श्रम ऐन कार्यान्वयनको माग गर्दै प्रशिक्षार्थी चिकित्सक आन्दोलनमा उत्रिएका छन् ।

शनिबार काठमाडौँको माइतीघर मण्डलामा हप्तामा एक दिन बिदा दिन र दैनिक १२ घण्टासम्म मात्रै काम गर्ने वातावरण मिलाउन माग गर्दै आन्दोलनमा उत्रिएका हुन् ।

उनीहरूले युवा तथा प्रशिक्षार्थी चिकित्सकको श्रम शोषण बन्द गर्न माग गरेका छन् । आन्दोलनरत एमबिबिएस उत्तीर्ण चिकित्सक डा.प्रज्ञान बस्नेतले नेपालमा एमबिबिएस पास गरेपछि एक वर्ष इन्टर्नसिप गर्नुपर्छ ।

एक वर्ष काम गरेर मात्र एमडीको अध्ययन गर्न पाइने तर आफूजस्ता चिकित्सक राम्रो अङ्क ल्याएपनि नेपालको उच्च शिक्षामा रहेको शोषणका कारण एमडी अध्ययन गर्न नसकेको बताउनुभयो ।

चिकित्सकले लगातार ३६ घण्टासम्म काम गर्नुपर्ने र अहिले देशमा दुई दिन बिदा दिइएको समयमा पनि एक दिन पनि आफूलाई बिदा नदिइएको भन्दै आपत्ति जनाउनुभयो ।

मेडिकल माफिया र केही शिक्षण अस्पतालको आम्दानीको श्रोतका लागि देशको मेधावी पुस्ता श्रम शोषणमा परिरहेको उहाँको जिकिर छ ।

देशमा सरकार, मन्त्रीहरू फेरिएर कांग्रेस, कम्युनिस्टबाट जेनजी र वालेनको सरकार आए पनि चिकित्सकको समस्या जहाँको त्यहीँ रहेको भन्दै दुःख व्यक्त गर्नुभयो । अधिकतम दिनमा १२ घण्टाको ड्युटी र हप्तामा एक दिन बिदा होस् भन्ने साधारण माग आफूहरूको रहेको उहाँको भनाइ छ ।

आन्दोलनरत प्रशिक्षार्थी चिकित्सकले युवा तथा प्रशिक्षार्थी चिकित्सकको श्रम शोषण बन्द गर्, मलाई बोल्न दे सरकार, स्वास्थ्यकर्मीको चमेली बोलिदिने कोही छैन, डाक्टरको ३६ घण्टे ड्युटी खारेज गर, प्रशिक्षार्थी चिकित्सकलाई श्रम ऐन लागु गर, सुत्केरीको उपचार गर्ने महिला डाक्टरलाई खोई सुत्केरी बिदा ? रातभर नसुतेको डाक्टर बिरामी छ, स्वास्थ्य सेवा बिरामी छ, देश बिरामी छ लगायतका प्लेकार्ड बोकेर प्रदर्शन गरेका हुन् ।