घोराहीमा सम्पन्न लुम्बिनी प्रदेश बक्सिङमा दाङको वर्चस्व

घोराही, जेठ ३० गते  । दाङको घोराहीमा भएको लुम्बिनी प्रदेशस्तरीय पुरुष तथा महिला बक्सिङ प्रतियोगितामा जिल्ला दाङ च्याम्पियन बनेको छ।

घोराही उपमहानगरपालिका-१५ स्थित दरबार स्केट पार्कमा भएको प्रतियोगितामा दाङले ४ स्वर्ण, ३ रजत र १ कांस्य‌  पदकसहित समग्र उपाधि जित्न सफल भएको हो। प्रतियोगितामा २ स्वर्ण र २ कांस्य पदकसहित पाल्पा दोस्रो स्थानमा भएको थियो।

प्रतियोगितामा बाँके र गुल्मीले समान १ स्वर्ण र १ रजत पदक जित्न सफल भएका छन्।‌ रुपन्देहीले‌ १  स्वर्ण, नवलपरासीले १ रजत र १ काश्य‌ र  अर्घाखाँचीले १ रजत पदक जित्न सफल भएको छ।

प्रतियोगिता प्रदेश खेलकुद परिषद्‌ लुम्बिनीको‌ आयोजनामा तथा लुम्बिनी प्रदेश बक्सिङ संघको प्राविधिक सहयोगमा शुक्रबार‌ र‌ शनिबार दुई दिन घोराहीमा भएको थियो ।

प्रतियोगिताका विजेता खेलाडीलाई प्रदेश खेलकुद परिषद्का सदस्य सचिव तिरनदाज गौतम, लुम्बिनी प्रदेश बक्सिङ संघका अध्यक्ष राजु गुरुङले प्रमाणपत्र वितरण गर्नुभएको थियो।‌प्रतियोगितामा लुम्बिनी प्रदेशका विभिन्न जिल्लाका खेलाडीको सहभागिता रहेको थियो।