फिफा विश्वकप : ट्युनिसियामाथि स्विडेन हाबी, पहिलो खेलमै ५ गोल

काठमाडौं। फिफा विश्वकप २०२६ अन्तर्गत समूह चरणको खेलमा स्विडेनले ट्युनिसियामाथि प्रभावशाली प्रदर्शन गर्दै ५–१ गोलको फराकिलो जित निकालेको छ।

आक्रमण र बल नियन्त्रणमा सुरुदेखि नै हाबी बनेको स्विडेनले खेलभर ट्युनिसियामाथि दबाब कायम राखेको थियो। स्विडेनको जितमा यासिन अयारी नायक बने। उनले दुई गोल गर्दै टोलीको जितमा महत्वपूर्ण योगदान दिए।

स्विडेनका लागि स्टार फरवार्ड अलेक्जान्डर इसाकले एक गोल थपे भने उत्कृष्ट लयमा रहेका भिक्टर ग्योकेरेसले पनि एक गोल गर्दै टोलीको अग्रता बलियो बनाए। माटियास स्वानबर्गले अर्को गोल थप्दै स्विडेनको गोल संख्या पाँच पुर्‍याएका थिए।

ट्युनिसियाले खेलमा एक गोल फर्काए पनि स्विडेनको आक्रामक खेल रोक्न सकेन। रक्षात्मक कमजोरी र अवसरको सदुपयोग गर्न नसक्दा ट्युनिसिया ठूलो अन्तरको हार बेहोर्न बाध्य बन्यो।

यस जितसँगै स्विडेनले विश्वकप अभियानको सुखद सुरुआत गरेको छ भने समूह चरणमा महत्वपूर्ण तीन अंक बटुलेको छ। अर्कोतर्फ ट्युनिसियाले पहिलो खेलमै निराशाजनक नतिजा व्यहोरेको छ।