विश्वकपमा पोर्चुगलको अभियान आजदेखि, रोनाल्डोको नजर ऐतिहासिक उपाधिमा

काठमाडौं । पोर्चुगलको विश्वकप ग्लोरी अभियान बुधबार डेमोक्रेटिक रिपब्लिक अफ कंगोसँग प्रतिस्पर्धा गरेसँगै सुरु हुनेछ । ह्युस्टन रंगशालामा हुने समूह ‘के’ को यो खेल नेपाली समयअनुसार राति १०;४५ बजे हुनेछ ।

सेलेसाओ दास क्विनासले अहिलेसम्म विश्वकप जितेको छैन । तर, यसपाली फ्रान्स र स्पेनसँगै पोर्चुगललाई उपाधिको प्रमुख दाबेदारका रुपमा हेरिएको छ । किनभने यसपाली पोर्चुगलको स्क्वाड डेप्थ एकदमै बलियो छ ।

विश्वकपमा पोर्चुगलको सबैभन्दा राम्रो प्रदर्शन ६० वर्षअघि आएको थियो । १९६६ इङ्ल्यान्ड विश्वकपमा टोली तेस्रो भएको थियो । त्यसयता विश्वकपमा टोलीको यात्रा संघर्षपूर्ण रहँदै आएको छ ।

२००६ जर्मनी विश्वकपमा पोर्चुगलले सेमिफाइनलसम्मको यात्रा गर्यो । गत संस्करण टोली क्वार्टरफाइनलमा पराजित भएको थियो । सन् २०१६ मा युरोपियन च्याम्पियनसिपको उपाधि जितेको पोर्चुगलले त्यसयता बलियो स्क्वाड हुनका बावजुद विश्वकपमा रवाफिलो प्रदर्शन गर्न सकेको छैन । यसपाली करिअरको उत्तरार्धमा रहेका भेट्रान खेलाडी क्रिस्टियानो रोनाल्डोका लागि भएपनि टोली जसरी पनि विश्वकप जित्न चाहन्छ ।

रोबर्टो मार्टिनेजको नेतृत्वमा रहेको पोर्चुगल साँचिक्कै बलियो छ । उज्वेकिस्तान र कोलम्बियासम्मिलित समूह ‘के’मा पोर्चुगल निर्विवाद शीर्ष स्थानमा रहने टोली हो भन्न सकिन्छ ।

विश्वकपअघि भएका तीनवटै मैत्रीपूणैै खेलमा पोर्चुगलले विजयी हासिल गरेको थियो । अमेरिका, चिली र नाइजेरिया पोर्चुगलसँग पराजित भएका थिए ।
अर्मेनियाविरुद्ध ९-१ को फराकिलो जितसँगै पोर्चुगलले विश्वकप छनोट अभियानको अन्त्य गरेको थियो । तर, त्यो खेलअघि टोली रिपब्लिक अफ आयरल्यान्डसँग पराजित भएको थियो । जसका कारण टोलीले अमेरिकामा उपाधिका लागि साँच्चिकै बलियो चुनौती दिने क्षमतामाथि प्रश्न चिन्ह अहिले पनि उठिरहेको छ ।

पोर्चुगल र कंगो अन्तर्राष्ट्रिय मञ्चमा पहिलोपटक आमने–सामने हुँदैछन् । लियोपाडर््सको उपनामले परिचित कंगोको चुनौती पन्छाउन नसके यो विश्वकप २०२६ कै दोस्रो ठूलो झट्का हुनेछ । सोमबार राति मात्र स्पेनलाई पहिलोपटक विश्वकप खेलिरहेको केप भेर्डेले गोलरहित बराबरीमा रोकेको थियो ।

कंगोले विश्वकपअघि पोर्चुगलको युरोपियन प्रतिद्धन्द्धी डेनमार्कलाई गोलरहित बराबरीमा रोकेको थियो । तर, सात दिनअघि मात्र टोली चिलीसँग २–१ ले पराजित भयो ।

कंगोले गत वर्ष सम्पन्न अफ्रिकन कप अफ नेसन्समा अन्तिम १६ सम्मको यात्रा गर्यो । जमाइकाविरुद्ध अन्तर महादेशीय प्लेअफमा जमाइकालाई १–० ले पराजित गर्दै लियापार्ड्सले ५२ वर्षपछि पहिलोपटक विश्वकपमा स्थान बनाएको हो ।

‘एक्पान्डेड’ विश्वकपले सेबास्टियन डेजाब्रेको नेतृत्वमा रहेको कंगोलाई नकआउट चरण प्रवेश गर्ने मौका दिएको छ । एउटा जितले पनि कंगोले कम्तिमा पनि तेस्रो स्थान हासिल गर्नेछ । यसपालि उत्कृष्ट ‘सेकेन्ड रनर्स–अप’ बन्ने टोलीलाई अन्तिम ३२ मा प्रवेश गर्ने अवसर रहेकाले एउटा जितले पनि धेरै महत्व राख्नेछ ।

कंगोविरुद्धको खेल पोर्चुगललाई सबैभन्दा कठिन परीक्षा हो । किनभने जुन २७ मा पोर्चुगलले भेट उज्वेकिस्तानसँग छ । जुन खेलले पोर्चुगलको आगामी यात्रा निर्धारण गर्नेछ । समूहको दोस्रो स्थानमा रहे टोलीले अन्तिम ३२ मा बलियो टोली इङ्ल्यान्ड अथवा क्रोएसियनसँग खेल्नुपर्ने हुन्छ । अनि अन्तिम १६ मा सम्भवतः उसको भेट स्पेनसँग हुन सक्छ ।

पोर्चुगलसँग अहिले कुनै पनि खालको इन्जुरी समस्या छैन । बुधबार ४१ वर्षीय रोनाल्डो आफ्नो २२९औं अन्तर्राष्ट्रिय खेलमा पोर्चुगललाई लिड गर्दैछन् ।

रोनाल्डो कंगोविरुद्ध आफ्नो १४३औं गोलको खोजीमा हुनेछन् । अनि निराशजनक २०२२ कतार विश्वकपलाई सुधार्ने लक्ष्यमा हुनेछन् । चार वर्षअघि उनले मात्र एक गोल गरेका थिए ।

फ्रेन्च च्याम्पियन पेरिस सेन्ट जर्मन ९पिएसजी०लाई लगातार दोस्रो सिजन युइएफए च्याम्पियन्स लिगको उपाधि जिताएका नुनो मेन्डेज, जोआओ नेभेज र भिटिन्हा पहिलो रोजाईमा खेल्न तयार छन् । त्यस्तै म्यानचेस्टर युनाइटेडबाट सानदार सिजन बिताएका ब्रुनो फर्नान्डेज पनि टोलीका महत्वपूर्ण सदस्य हुन् ।

कंगोको हकमा स्क्वाडमा आरोन वान बिसाका, तुआन्जेबे, चान्सेल म्बेम्बा र आर्थर मासुआकु जस्ता नाम चलेका खेलाडीहरु छन् । पोर्चुगलविरुद्ध टोली ब्याक फाइबमा खेल्ने अनुमान गरिएको छ ।

सन्डरल्यान्डका नोआ सादिकीले मिडफिल्डलाई लिड गर्नेछन् । त्यस्तै स्ट्राइकरमा न्युक्यासलका योआन विस्सा र रियाल बेटिजका सेड्रिक बाकाम्बुमध्ये एक जना हुने अनुमान गर्न सकिन्छ ।

बकाम्बुको नाममा २१ गोल छ । त्यस्तै न्युक्यासलमा कठिन सिजन बिताएका विस्साले ९ गोल गरेका छन् । समूह ‘के’को अर्को खेलमा बिहीबार बिहान नेपाली समयअनुसार ७:४५ बजे उज्वेकिस्तान र कोलम्बियाले एकअर्कासँग प्रतिस्पर्धा गर्नेछन् ।