विश्वकप २०२६ : गोलको खोजीमा संघर्षरत इङ्ल्यान्ड, घानासँग बराबरीमा सीमित

काठमाडौं। फिफा विश्वकपमा इङ्ल्यान्डले घानासँग ०–० को निराशाजनक बराबरी खेलेपछि समूह एलको विजेताका रूपमा नकआउट चरणमा पुग्ने लक्ष्यका लागि अन्तिम खेलसम्म प्रतीक्षा गर्नुपर्ने भएको छ।

जिलेट स्टेडियममा ६३ हजार ९८३ दर्शकमाझ भएको खेलमा इङ्ल्यान्डले अधिकांश समय बलमा नियन्त्रण राखे पनि गोल गर्न सकेन। प्रशिक्षक थोमस टुकेलको टोलीले १९ पटक प्रहार गर्दा घानाले मात्र दुई अवसर सिर्जना गरेको थियो।

खेलको अन्त्यतिर निको ओ’राइलीको हेडर क्रसबारमा लागेर फर्किएपछि इङ्ल्यान्ड गोल गर्नबाट वञ्चित रह्यो। क्रोएसियाविरुद्धको पहिलो खेलमा ४–२ को जित निकालेको इङ्ल्यान्ड यसपटक भने अपेक्षाअनुसार प्रदर्शन गर्न असफल रह्यो।

समूह एलमा अब इङ्ल्यान्ड र घानाको समान चार–चार अंक रहेको छ। दुवै टोलीको अर्को चरण प्रवेश लगभग निश्चित भए पनि अन्तिम स्थान निर्धारण हुन बाँकी छ।

चिसो र भिजेको मौसममा खेलिएको खेलमा इङ्ल्यान्डको प्रदर्शन युरो २०२४ का केही फितला खेलहरूजस्तै देखिएको थियो। यद्यपि, यो नतिजाले टोलीलाई ठूलो क्षति भने पुर्‍याएको छैन।

अब शनिबार मेटलाइफ स्टेडियममा पानामाविरुद्ध हुने अन्तिम समूह खेलमा राम्रो नतिजा निकाल्न सके इङ्ल्यान्ड समूह विजेताका रूपमा अगाडि बढ्न सक्छ।

विश्वकप इतिहासमा अफ्रिकी टोलीसँग कहिल्यै नहारेको इङ्ल्यान्डको त्यो कीर्तिमान पनि कायम रह्यो।

विश्व वरीयतामा ७३औँ स्थानमा रहेको घानाले भने उत्कृष्ट रक्षात्मक प्रदर्शन गर्‍यो। इङ्ल्यान्डभन्दा ६९ स्थान तल रहेको टोलीले प्रशिक्षक कार्लोस क्विरोजको नेतृत्वमा अनुशासित खेल प्रस्तुत गर्‍यो। पानामामाथि १–० को जित निकालेको घानाले अब फिलाडेल्फियामा क्रोएसियासँग खेल्नेछ।

पानामाविरुद्धको खेल भिसा समस्याका कारण गुमाएका थोमस पार्टे घानाको टोलीमा फर्किएका थिए। स्थानीय क्लब हार्ट्स अफ ओकका गोलकिपर बेन्जामिन असारेले पनि उत्कृष्ट प्रदर्शन गर्दै इङ्ल्यान्डलाई गोलरहित बनाए।

इङ्ल्यान्डका कप्तान ह्यारी केनले विश्वकपमा आफ्नो गोल संख्या बढाउन सकेनन्। उनी अझै १० गोलसहित ग्यारी लिनेकरसँग इङ्ल्यान्डका सर्वाधिक विश्वकप गोलकर्ताको सूचीमा संयुक्त रूपमा रहेका छन्।

नोनी माडुएके र एन्थोनी गोर्डनले विङबाट प्रभाव जमाउन सकेनन् भने पछि मैदान प्रवेश गरेका खेलाडीहरूले पनि खेलको दिशा बदल्न सकेनन्।

जुड बेलिङहमले इङ्ल्यान्डका लागि आफ्नो ५०औँ अन्तर्राष्ट्रिय खेल खेले। पहिलो हाफमा डेक्लान राइसको फ्रिकिक बारभन्दा थोरैले माथिबाट बाहिरिएपछि इङ्ल्यान्ड गोल नजिक पुगेको थियो।

दोस्रो हाफमा असारेले गोर्डनको प्रहार सहजै बचाएका थिए। खेलका क्रममा घानाले गोल गर्ने केही अवसर पनि पायो। विशेषगरी प्रिन्स अडुमाथि गोलरक्षक जोर्डन पिकफोर्डको चुनौतीलाई लिएर घानाका खेलाडीहरूले पेनाल्टीको माग गरेका थिए, तर रेफ्रीले इङ्ल्यान्डको पक्षमा फ्रिकिक दिएका थिए।

खेलको अन्तिम समयमा बुकायो साकाको प्रहार असारेले उत्कृष्ट बचाउ गरे। त्यसलगत्तै ओराइलीको हेडर पोस्टमा लाग्यो भने केनको प्रहार बारमाथिबाट बाहिरिएपछि खेल गोलरहित बराबरीमा समाप्त भयो।