विश्वकप २०२६ : स्पेन र स्विट्जरल्यान्डको सहज जित

लस एन्जल्स, असार २० गते । मिकेल ओयरजाबालले दुई र पेड्रो पोरोले एक गोल गरेपछि स्पेन शुक्रबार अस्ट्रियालाई सहजै ३–० ले हराएर विश्वकप फुटबल–२०२६ को अन्तिम १६ मा पुगेको छ । स्पेनको अपराजित यात्रा ३५ खेल पुगेको छ । यसै गरी स्विट्जरल्यान्डले पनि अल्जेरियालाई सजिलै २–० ले पराजित गरी प्रिक्वाटरफाइनलमा स्थान बनायो ।

खेल अवधिभर अस्ट्रियालाई दबाबमा राखेको युरोपेली च्याम्पियन स्पेनको जित अझ फराकिलो हुन सक्थ्यो । स्पेनले गरेको एक गोल अमान्य भयो भने फ्रिकिकमा भएको एक प्रहारमा गोलपोस्ट बाधक बनेको थियो । खेलको सुरुवातमै लामिने यमालको कर्नरमा मार्क कुकुरेलाले गोल गर्नुभएको थियो तर पाउ कुबार्सीले अस्ट्रियाका गोलरक्षक अजेक्ज्यान्दर स्लागरलाई बाधा पु¥याएको भन्दै उक्त गोललाई मान्यता दिइएन ।

खेलको ३६ औँ मिनेटमा स्पेनले अस्ट्रियाको डिफेन्स तोड्यो । कुकुरेलाको क्रसमा ओयरजाबलले गोल गरी स्पेनलाई अगाडि पार्नुभएको हो । त्यसपछि पनि स्पेनले लगातार आक्रमण गरेको थियो । विशेषतः मैदानको बायाँ भागबाट लगातार विपक्षीको गोलपोस्टमा आफ्ना साथी खेलाडीलाई बल उपलब्ध गराउने यमाल अस्ट्रियाको डिफेन्सको टाउको दुःखाइ बनेको थियो । सोही शृङ्खलाबद्ध आक्रमणकै क्रममा आलेक्स बाएनाले फ्रिकिकमा प्रहार गरेको बल गोलपोस्टमा लागेर फर्कियो । त्यसपछि यमालले ‘रिबान्ड’ मा गरेको प्रहार स्लागरले विफल पार्नुभयो ।

खेलको ६६ औँ मिनेटमा पेड्रोको गोलबाट स्पेनले अग्रता दोब्बर पा¥यो । बायनेको क्रसमा पेड्रोले हेड गोल गर्नुभएको हो । निर्धारित समय सकिन एक मिनेट बाँकी छँदा कुकुरेला र ओयरजाबलको सहकार्यमै स्पेनलाई तेस्रो गोल प्राप्त भयो । कुकुरेलाको क्रसमा डिबक्समा बिनानिगरानीमा रहेका ओयरजाबलले आफ्नो दोस्रो र टिमको तेस्रो गोल गर्नुभएको हो । यस विश्वकपमा ओयरजाबलले कुल चार गोल गर्नुभएको छ । स्पेनका प्रशिक्षक लुइस डिला फुएन्टेले आफ्नो टिमले पहिलो पटक आफ्नो छवि अनुसार खेलेको बताउनुभयो । सन् २०१० को विश्व विजेता स्पेनलाई यसपालि पनि उपाधि दाबेदार मानिएको छ तर स्पेनले समूह चरणका तिनै खेलमा अपेक्षा अनुरूप प्रदर्शन गर्न सकेको थिएन ।

यसै गरी भानकुभरमा भएको खेलमा स्विट्जरल्यान्डले नकआउट चरणमा हार्ने नियतिलाई तोड्नुभयो । सन् १९३८ मा फ्रान्समा भएको विश्वकपपछि स्विट्जरल्यान्डले पहिलो पटक नकआउट खेल जितेको हो । लगातार छैटौँ पटक विश्वकप खेलिरहेको स्विट्जरल्यान्ड चार पटक नकआउटमा पुगे पनि अन्तिम १६ भन्दा माथि उठ्न सकेको छैन । सन् २००६, २०१४, २०१८ र २०२२ मा स्विट्जरल्यान्ड अन्तिम १६ बाट बिदा भएको थियो । सन् २०१० मा भने स्विट्जरल्यान्डको चुनौती समूह चरणमै समाप्त भएको थियो । स्विट्जरल्यान्डका लागि खेलको १० औँ मिनेटमै ब्रिल इम्बोलोले पहिलो गोल गर्नुभयो । जोहान मान्जाम्बीले बायाँ भागबाट बनाएको ‘सोलो रन’ पछि मिलाइदिएको पासमा इम्बोलोले सफलता पाउनुभएको हो । मध्यान्तरपछि खेल सुरु भएको एक मिनेटपछि नै डान एन्डोएले स्विट्जरल्यान्डको अग्रता दोब्बर पार्नुभयो । अल्जेरियाका डिफेन्डर रफिक बेलघालीको गल्तीमा एन्डोएले मौकाको फाइदा उठाउनुभएको हो । स्विट्जरल्यान्डले प्रिक्वाटरफाइनलमा कोलम्बिया अथवा घानामध्ये एकविरुद्ध खेल्ने छ । एपी