ईएमआर प्रणाली लागू गर्न स्वास्थ्य बीमा बोर्डको निर्देशन

काठमाडौं । स्वास्थ्य बीमा बोर्डले सेवा प्रदायक स्वास्थ्य संस्थालाई सम्पूर्ण स्वास्थ्य सेवामा इलेक्ट्रोनिक मेडिकल रेकर्ड (ईएमआर) प्रणाली अनिवार्य रूपमा लागू गर्न निर्देशन दिएको छ ।

बोर्डले स्वास्थ्य बीमा कार्यक्रममा आबद्ध सबै स्वास्थ्य संस्थालाई पत्र पठाउँदै आफूले प्रदान गर्ने स्वास्थ्य सेवामा अनिवार्य रुपमा ईएमआर प्रणाली लागू गर्न र सोही प्रणालीमार्फत स्वास्थ्य बीमाको दाबी पेश गर्ने व्यवस्था मिलाउन भनेको हो ।

स्वास्थ्य बीमा आबद्ध अधिकांश सेवा प्रदायक संस्थाले हालसम्म म्यानुअल रूपमा दाबी पेश गर्दै आएका थिए । बोर्डले म्यानुअल माध्यमबाट दाबी प्राप्त हुँदा दाबी रुजु तथा मूल्यांकन प्रक्रियामा बढी समय लाग्ने र सेवा प्रदायक संस्थालाई दाबी भुक्तानी गर्नसमेत ढिलाइ हुने गरेको सूचनामा उल्लेख छ ।

‘दाबी भुक्तानीमा हुने ढिलाइले स्वास्थ्य सेवा प्रवाहमै कठिनाइ उत्पन्न हुने अवस्था रहेकाले स्वास्थ्य बीमा प्रणालीलाई समयसापेक्ष रूपान्तरण गर्दै दाबी व्यवस्थापन प्रक्रियालाई छिटो, पारदर्शी र डिजिटल बनाउन ईएमआर कार्यान्वयन गर्न लागिएको हो,’ सूचना मार्फत भनिएको छ ।

यस्तै बोर्डले सबै सेवा प्रदायक स्वास्थ्य संस्थालाई आफ्नो संस्थामा हाल सञ्चालनमा रहेको अस्पताल सफ्टवेयर, प्रयोग भइरहेका मोड्युल तथा आगामी दिनमा ईएमआर प्रणाली विस्तार र कार्यान्वयनका लागि तय गरिएको योजनासमेत उपलब्ध गराउन भनेको छ ।