महिला भलिबलमा नेपाल हङकङसँग पराजित, अब ११औँ स्थानका लागि प्रतिस्पर्धा गर्ने

काठमाडौँ । जापानमा जारी २०औँ एसियन गेम्सअन्तर्गत महिला भलिबलमा नेपाल हङकङसँग पराजित भएको छ। सोमबार जापानको ओकाजाकी सेन्ट्रल पार्क जनरल जिम्नेसियममा भएको ९ देखि १२औँ स्थान निर्धारणको खेलमा नेपाल हङकङसँग ३–० को सोझो सेटमा पराजित भएको हो।

हङकङले खेलको पहिलो सेट २५–२० ले आफ्नो पक्षमा पारेको थियो। दोस्रो सेटमा पनि हङकङले नेपाललाई २५–१९ ले पराजित गर्दै खेलमा २–० को अग्रता बनायो।

तेस्रो सेटमा भने नेपालले हङकङलाई कडा चुनौती दिएको थियो। दुवै टोलीबीच निकै प्रतिस्पर्धात्मक बनेको सेटमा हङकङले २८–२६ को जित निकाल्दै खेल ३–० ले आफ्नो पक्षमा पार्‍यो।

हङकङसँगको हारसँगै नेपालले अब ११औँ स्थानका लागि प्रतिस्पर्धा गर्नेछ। नेपालले फिलिपिन्स र मंगोलियाबीच हुने खेलमा पराजित हुने टोलीसँग ११औँ स्थानका लागि प्रतिस्पर्धा गर्ने तालिका रहेको छ।

नेपालले एसियन गेम्सको यस संस्करणमा समूह चरणमा आयोजक जापान र इन्डोनेसियासँग पराजय बेहोरेको थियो। त्यसपछि वर्गीकरण खेलमा नेपालले किर्गिस्तानलाई ३–० ले पराजित गर्दै ९ देखि १२औँ स्थानको चरणमा प्रवेश गरेको थियो।

एसियन गेम्समा नेपाली महिला भलिबल टोलीको यो दोस्रो सहभागिता हो। यसअघि नेपालले सन् २०२३ मा चीनको हाङझाउमा भएको १९औँ एसियन गेम्समा पहिलो पटक सहभागिता जनाएको थियो।