नेपाल समूह ‘ए’ मा २ खेलबाट ३ अंक जोड्दै समूह विजेता बनेर क्वाटरफाइनलमा प्रवेश

काठमाडौं।२०औँ एसियन गेम्सअन्तर्गत पुरुष क्रिकेटमा नेपाल र जापानबीचको खेल वर्षाका कारण नतिजाविहीन (रद्द) भएको छ।

वर्षाका कारण सुरु हुनै ढिला भएको यो खेल करिब एक घण्टापछि १५-१५ ओभरमा घटाएर खेलाइएको थियो।

टस हारेर पहिले ब्याटिङको निम्तो पाएको नेपालले उत्कृष्ट प्रदर्शन गर्दै १५ ओभरमा ४ विकेटको क्षतिमा १४९ रनको बलियो योगफल तयार पारेको थियो। नेपालका लागि जोराले ३२ बलमा ५७ रन र लोकेशले २२ बलमा ५२ रनको आक्रामक अविजित अर्धशतकीय पारी खेले। त्यस्तै, आसिफ शेखले २१ रनको योगदान दिए। जापानका तर्फबाट रियो साकुरानो थोमस, इब्राहिम ताकाहाशी, कुसुदा नारानी र डेक्लान सुजुकीले १-१ विकेट लिए।

नेपालको इनिङ्स सकिनेबित्तिकै पुनः भारी वर्षा सुरु भएपछि मैदानलाई कभरले ढाकिएको थियो। निरन्तरको वर्षाका कारण दोस्रो इनिङ्स सुरु नै हुन नसकेपछि खेल नतिजाविहीन घोषणा गरियो।

यस नतिजासँगै १ अंक बाँडेको नेपाल समूह ‘ए’ मा २ खेलबाट ३ अंक जोड्दै समूह विजेता बनेर क्वाटरफाइनलमा प्रवेश गरेको छ। यही समूहबाट अफगानिस्तान २ खेलमा २ अंकका साथ उपविजेता बनेको छ।

अब क्वाटरफाइनलमा नेपालले श्रीलंकासँग प्रतिस्पर्धा गर्नेछ भने अफगानिस्तानले भारतको सामना गर्नेछ।