विजय माझी पुरुष कायाक एकलको फाइनल चरणमा प्रवेश

काठमाडौँ । नेपालका विजय माझी २०औँ एसियाली खेलकुदको कनोइ स्लालमअन्तर्गत पुरुष कायाक एकलको फाइनल चरणमा प्रवेश गरेका छन् ।

याहागिगावा कनोइ स्लालम कोर्समा बुधबार भएको सेमिफाइनल चरणको खेलमा २७५.७३ स्कोरका साथ १६ औँ स्थानमा रहेर विजय फाइनल चरण प्रवेश गरेका हुन् ।

सेमिफाइनलमा सहभागिता जनाएका अर्का नेपाली खेलाडी आशिष राना मगर भने फाइनल प्रवेशमा सफल भएनन् ।

विजय १६ औँ स्थानका साथ फाइनल चरण पुग्दा आयोजक जापानका युकी तानाका ९१.७१ स्कोरका साथ शीर्ष स्थानमा रहेर फाइनल प्रवेश गरेका छन् ।

अघिल्लो दिन मङ्गलवार विजय र आशिश दुवैले पहिलो चरणमा सफलता हासिल गर्दै सेमिफाइनलमा स्थान बनाएका थिए ।

एसियाली खेलकुदअन्तर्गत जुडोमा नेपालका चार खेलाडी आ–आफ्नो खेलमा पराजित भएका छन् ।

महिला ४८ केजी तौल समूहको राउन्ड अफ १६ मा नेपालकी निशा श्रेष्ठ हङकङकी का ली वोङसँग २ मिनेट ३२ सेकेन्डमा इप्पोनबाट पराजित भइन् ।

महिला ५२ केजी तौल समूहको राउन्ड अफ १६ मा नेपालकी देवकी माया श्रेष्ठ भियतनामकी थि नगान हा लामसँग पराजित भइन् । पुरुष ६६ केजी तौल समूहको राउन्ड अफ ३२ मा नेपालका विशाल विक हङकङका का कि वोङसँग वाजाआरीबाट पराजित भए । त्यस्तै, पुरुष ६० केजी तौल समूहको राउन्ड अफ १६ मा नेपालका विकास विक उज्बेकिस्तानका समरिद्दिन कुचकारोभसँग ३ मिनेट १२ सेकेन्डमा इप्पोनबाट पराजित भए ।

नेपाली गल्फर सुभाष तामाङले एसियाली खेलकुदअन्तर्गत पुरुष गल्फको पहिलो चरणमा इभन पार ७० स्कोर गर्दै संयुक्त १८औँ स्थान हासिल गरेका छन् ।

महिलातर्फ नेपालकी तारा कार्की चित्रकार २१ ओभर ९१ स्कोरसहित संयुक्त ४३औँ स्थानमा छिन् । नेपालका अर्का खेलाडी सद्भाव आचार्यले भने प्रतियोगिताबाट नाम फिर्ता लिएका छन् । ज्वरो आएपछि मङ्गलवार अस्पताल भर्ना भएका सद्भाव अझै अस्पतालमै छन् ।