जसपासँग मिलेर संसदको विशेष अधिवेशन बोलाउने काँग्रेसको तयारी

काठमाण्डौंः प्रमुख प्रतिपक्ष दल नेपाली काँग्रेसले सरकारले अधिवेशन आह्वानको सिफारिस नगरे एक चौथाईको समर्थन जुटाएर संसदको विषेश अधिवेशन बोलाउने तयारी सुरु गरेको छ ।

यसअघि, संसद चलिरहेको बेला सभामुख अग्नि सापकोटालाई नै थाहा नदिएर प्रधानमन्त्री ओली नेतृत्वको मन्त्रिपरिषद् बैठकको सिफारिसमा राष्ट्रपति विद्या भण्डारीले संसद बैठक अन्त्य गरेका थिए ।

देशमा कोरोना भाईरस महामारी लगायतका विभिन्न राष्ट्रिय महत्वका विषयहरु अलपत्र परिरहेको बेला संसद बैठक अन्त्य गर्ने सरकारी निर्णयको कांग्रेसले विरोध गर्दै आएको छ ।

प्रतिनिधिसभामा सत्तारुढ नेकपाका १ सय ७४ र नेपाली कांग्रेसका ६३ जना सांसद रहेका छन् । २५ प्रतिशत संख्या पुर्याउन कांग्रेसलाई थप केही सांसद आवश्यक पर्छ । प्रतिनिधिसभामा २७५ सदस्य भएकाले एक चौथाई पुग्न ६९ सांसद आवश्यक पर्छ ।

नेपाली काँग्रेसका ६३ मध्येका विजयकुमार गच्छदार र अफताफ आलम निलम्बनमा रहेकोले एक चौथाई पुर्याउन काँग्रेसलाई ९ जना अन्य दलका सांसदको समर्थन आवश्यक हुन्छ ।

काँग्रेसले संसदमा रहेको अर्को प्रतिपक्षी दल जनता समाजवादी पार्टी (जसपा)सँग सहयोग लिनेबारे संवाद सुरु गरेको छ । यसबारे जसपाले भने अहिलेसम्म कुनै प्रतिक्रिया दिएको छैन ।