चीनले दिएको ३० हजार लिटर तरल अक्सिजन तातोपानी नाका आइपुग्यो

काठमाडौंः चीन सरकारले नेपाललाई अनुदानमा दिएको अक्सिजन र स्वास्थ सामाग्री अन्तर्गत आज तातोपानी नाकामा अक्सिजन र स्वास्थ सामाग्री आइपुगेको छ ।

३० हजार लिटर परिमाणका एक सय ५० थान तरल अक्सिजन सिलिन्डर तथा स्वास्थ्य सामाग्री आइपुगेको तातोपानी सुख्खा बन्दरगाह तथा भन्सार कार्यालयका प्रमुख नारद गौतमले जानकारी दिए ।

उक्त लिक्विड अक्सिजनबाट ४० केजी क्षमताको ६ हजार सिलिन्डर अक्सिजन भरिने प्रमुख गौतमले बताए । उक्त अक्सिजन र स्वास्थ सामाग्री बुझ्न स्वास्थ सेवा विभागका महानिर्देशक डा. दीपेन्द्रमान सिंह तातोपानी नाका आइपुगेका छन् ।

चिनियाँ सरकारका प्रतिनिधिबाट उनले उक्त अक्सिजन र स्वास्थ सामाग्री बुझेको भन्सार प्रमुख गौतमले बताए ।

‘अक्सिजन भरिएका सिलिन्डर भन्सारमा जाँचपास गरिदै छ,’ जाँचपास सकिने बित्तिकै आज नै उक्त अक्सिजन भरिएको सिलिन्डर काठमाडौं पठाउने तयारी रहेको प्रमुख गौतमले बताएका छन्।

लिक्विड अक्सिजनले भरिएका सिलिन्डर बिस्तारै लैजानु पर्ने भएका कारण आज रातीसम्म मात्रै काठमाडौं आइपुग्ने पनि गौतमले जानकारी दिए।

१८ हजार थान अक्सिजन सहितको सिलिन्डर दिने चीनको प्रतिबद्धता अनुरुप बाँकी अक्सिजन भोलिदेखि आउन सुरु हुने गौतमले बताए । यसअघि चीनबाट नेपाली ब्यापारीहरुले जेठ ३ गतेदेखि अक्सिजन सिलिन्डर ल्याउन थालेका थिए । समाचार आजको गोरखापत्र दैनिक