भारतीय कम्पनी युमेडिकाको औषधि आयातमा प्रतिबन्ध

काठमाडौँ: औषधि व्यवस्था विभागले भारतीय उत्पादक कम्पनी युमेडिकाको औषधि नेपाल आयातमा प्रतिबन्ध लगाएको छ।

अघिल्लो साता विभागले कम्पनीको आयात अनुमतिपत्र नै खारेज गरी औषधि आयातमा प्रतिबन्ध लगाएको विभागले जनाएको छ।

विभागका महानिर्देशक नारायण ढकालका अनुसार अनुगमनका क्रममा नेपाली बजारमा आयातित कम्पनीको एउटा औषधिमा बाहिरी लेभलअनुसार भित्री औषधि फरक पाइएपछि आयातमा प्रतिबन्ध लगाइएको हो। कम्पनीबाट उत्पादित एन्टिबायोटिक सेफ्रोमेक्सिन लेखिएको लेभलको प्याकेटभित्र सेफालोजिन औषधि राखिएको थियो।

सेफालोजिन हजार एमजीको छ भने सेफ्रामेक्सिन ७ सय ५० एमजीको छ। एउटा रोगका लागि प्रयोग गरिने सेफ्रामिक्सिनभित्र फरक रोगमा प्रयोग गरिने र तलमाथि डोजमा एन्टिबयोटिक हुनु भनेको उपचारमा फरक पर्न जाने हुनाले उपभोक्तामा असर पर्ने विभागका प्रमुख ढकालको भनाइ छ।

औषधि व्यवस्था विभागले भारतीय औषधि उत्पादक कम्पनी युमेडिकाको सबै औषधि नेपाल आयातका लागि रोक लगाएको छ। नागरिक दैनिक