मुख्यमन्त्री राजेन्द्र राईले विश्वासको मतका लागि गरे प्रस्ताव दर्ता

काठमाण्डौंः प्रदेश १ का मुख्यमन्त्री राजेन्द्र राईले विश्वासको मतका लागि आज (आइतबार) प्रदेशसभामा प्रस्ताव दर्ता गरेका छन् ।

दुई दिनअघि विश्वासको मतसम्बन्धी प्रस्ताव संसद् सचिवालयमा दर्ता गर्नुपर्ने प्रावधान भएका कारण मुख्यमन्त्रीले स्वकीय सचिव सन्दीप राईमार्फत आज प्रस्ताव दर्ता गराएका हुन् ।

मंगलबार दिउँसो साढे १२ बजे बस्ने प्रदेशसभा बैठकमा विश्वासको मत लिन आज प्रस्ताव दर्ता गरीएको मुख्यमन्त्री राईका स्वकीय सचिव राईले जानकारी दिए ।

गत १६ कात्तिकमा पाँच दलीय गठबन्धनका तर्फबाट नेकपा (एकीकृत समाजवादी)का नेता राई मुख्यमन्त्री नियुक्त भएका थिए ।

मंगलबार विश्वासको मत लिएपछि मात्र उनले सरकार विस्तार गर्ने अभिव्यक्ति दिँदै आइरहेका छन् ।