‘होम ग्राउण्ड’ मा शतप्रतिशत जितको खोजीमा मनाङ मर्स्याङ्दी

काठमाडौँ: नेपालमा विसं २०११ देखि सहिद स्मारक ‘ए डिभिजन लिग’ फुटबलको सुरुआत भयो । विभिन्न उतार चढावका बीच घरेलु फुटबलको सर्वोच्च प्रतियोगिताले अहिले ६७ वर्ष पार गरेको छ । ‘ए डिभिजन लिग’ फुटबलको इतिहासमा पहिलो पटक यस वर्ष लिगका तीन खेल राजधानी बाहिर आयोजना हुने भएका छन् ।

लिगको सफल क्लब मनाङ मस्र्याङ्दीले लिगलाई राजधानी बाहिर पोखरामा ल्याउने वातावरण बनायो । अखिल नेपाल फुटबल सङ्घ(एन्फा)को सहयोग र मनाङको अग्रसरतामा पहिलोपटक ए डिभिजन लिग फुटबल मोफसल फर्किएको हो ।

पोखरा रङ्गशालास्थित अन्तर्राष्ट्रिय फुटबल स्टेडियमलाई मनाङको घरेलु मैदान(होम ग्राउण्ड) मानिएको छ । गण्डकी प्रदेश र पोखरामा मनाङका समर्थक बढी छन् । मनाङको खेल हुनेभएपछि दर्शक रङ्गशालामा उत्साहित हुँदै आउने गर्दछन् ।

समर्थकको बाक्लो उपस्थितिका बीच खेल्दा आफू अनुकूलको नतिजा निकाल्न टोलीलाई सहयोग पुग्दछ । आगामी दिनमा ‘होम एण्ड अवे’ को लिग अवधारणालाई विकास गर्न एन्फाको योजनापछि मनाङले पोखरालाई घरेलु मैदान बनाएको हो ।

मनाङले जारी सहिद स्मारक लिगमा पोखरामा आफ्नो तीन खेल खेल्ने क्रममा पाँचौँ र सातौँ चरणका दुई खेल खेलिसकेको छ । गत पुस ३ र १७ गते दुई खेल खेलेको मनाङले अन्तिम खेलमा शनिबार ‘रेलिगेशन जोन’ मा रहेको च्यासल युथ क्लबसँग खेल्दैछ ।

नेपाल पुलिस क्लब र बिग्रेड ब्वाइज क्लब (बिबिसी) सँगका दुई खेलमा जित हासिल गरेको मनाङ घरेलु मैदानमा तेस्रो जितको खोजीमा हुनेछ । च्यासलसँगको खेल जित्दै राजधानी बाहिरका लिगका तीन खेलमा शतप्रतिशत नतिजा निकाल्ने योजनामा मनाङको टिम रहेको छ ।

च्यासलसँगको खेल मनाङको लागि अङ्क तालिकामा शीर्ष स्थानमा उक्लिने अवसर बन्नेछ । छैटौँ चरणमा बिबिसीसँगको खेल जित्दै शीर्ष स्थानमा उक्लिए पनि मनाङले एएफसी कम खेल्ने सपना पूरा गर्न सकेन । भोलिपल्ट मछिन्द्र फुटबल क्लबले नेपाल पुलिस क्लबलाई पराजित गरेपछि मनाङको एएफसी कप खेल्ने सपना तुहिएको हो ।

मछिन्द्र पुलिससँग पराजित वा बराबरीमा रोकिएको अवस्थामा एएफसी खेल्ने भाग्य मनाङको जुर्ने थियो । एएफसीमा नेपालको प्रतिनिधित्व गर्ने अवसर नजुरे पनि मनाङलाई शनिबारको खेलमा विजयी हुँदै लिगमा शीर्ष स्थानमा रहँदै उपाधि होडलाई थप बलियो बनाउने मौका रहेको छ ।

मनाङले हालसम्म सात खेलमा १६ अङ्क जोड्दै दोस्रो स्थानमा छ । ‘लिग लिडर’ मछिन्द्रभन्दा मनाङ एक अङ्कले मात्र पछाडि छ । त्यसले पनि च्यासलसँगको खेल जित्दै शीर्ष स्थानमा उक्लिने र उपाधि होड बलियो बनाउने अवसर मनाङलाई छ ।

पोखरा रङ्गशालामा पहिलो खेलमा मनाङले नेपाल पुलिस क्लबलाई ३–१ गोल अन्तरले पराजित गरेको थियो । त्यसैगरी बिबिसीसँग दोस्रो खेलमा १–० को कठिन जित निकालेको थियो । शनिबार पोखरा रङ्गशालामा हुने खेलअघि आज आयोजना गरिएको पत्रकार सम्मेलनमा मनाङ र च्यासल दुवै टोलीका प्रशिक्षकले खेलमा सुधार गर्दै राम्रो फुटबल खेलेर तीन अङ्क जोड्ने दाबी गरेका छन् ।

मनाङ मस्र्याङ्दीका विदेशी प्रशिक्षक फुजा टोपेले एएफसीमा छनोट नभए पनि टोलीको मनोबल कम नभएको बताए । घरेल मैदानमा आफ्नो टोलीले खेल नगुमाउने बताउँदै उनले शनिबार फरक रणनीतिका साथ मैदान ओर्लने योजना रहेको सुनाए ।

एएफसी गुमाए पनि लिगको उपाधि जित्ने अवसर रहेकाले सोहीअनुसार मिहिनेत गरेर बाँकी खेल खेल्ने प्रशिक्षक टोपेले बताए । च्यासलका प्रशिक्षक बाल गोपाल साहुखलले रेलिगेसन जोनबाट बाहिर निस्कन चाहेकाले राम्रो खेल पस्किदै तीन अङ्क बटुल्ने बताए ।

पछिल्लो खेलमा सुधार भएकाले खेलाडीमा कन्फिडेन्स बढेको उनले उल्लेख गरे । उनले भने, “रेलिगेशन जोनबाट माथि आउन हामीलाई जित चाहिन्छ, मनाङ बलियो टोली हो । तयारी राम्रो भएको छ, पछिल्लो खेलमा सुधार गरेकाले खेलाडी कन्फिडेन्स छन् । आस गरौँ हामी भोली राम्रो प्रदर्शन गर्नेछौँ ।”

अघिल्ला खेलमा देखिएको रक्षात्मक गल्तीलाई सुधार गर्दै आक्रमणमा सुधार गर्ने रणनीति टोलीको रहेको साहुखलले बताए। रासस