काठमाण्डौंः प्रदेश नं १ को सरकारले मोरङ जिल्लाको लेटाङ नगरपालिका–५ स्थित शिक्षा विकास माध्यमिक विद्यालयमा आइतबार भएको घटनाप्रति दुःख व्यक्त गरेको छ ।
प्रदेश नं १ सरकारका यातायात व्यवस्था तथा सञ्चारमन्त्री उपेन्द्रप्रसाद घिमिरेले आज विज्ञप्ति जारी गर्दैै यस्तो घटनाले आफू स्तब्ध भएको उल्लेख गर्नुभएको छ । मन्त्री घिमिरेले मोरङ निर्वाचन क्षेत्र नं १ (ख) अन्तर्गत लेटाङ नगरपालिका– ५ स्थित सो विद्यालयमा मिति २०७८ चैत ६ गते आइतबारको घटनामा आफ्नो जिम्मेवारी पूरा गर्ने क्रममा नेपाल प्रहरीका एक कर्तव्यनिष्ठ प्रहरी जवान उर्मिला श्रेष्ठको निधन भएकोमा गहिरो दुःख व्यक्त गर्नुभएको छ ।
मिति २०७८ चैत ४ गते शिक्षा विकास माविका एक शिक्षकले सोही विद्यालयकी एक छात्रालाई यौन दुव्र्यवहार गरेको भनिएको घटना वास्तविक न्याय पाउने दिशामा अघि बढिरहेको अवस्थामा भएको यस प्रकारको जघन्य घटनाको निन्दा गरे पनि कमै हुने उहाँले उल्लेख गर्नुभएको छ ।
मन्त्री घिमिरेले केही अराजक व्यक्तिको भीडले घटनालाई हिंसातिर मोड्ने मनसायले शिक्षकमाथि आक्रमण, विद्यालय तोडफोड, आगजनी गर्न सुरु गरेकाले भीड नियन्त्रण गर्न र शान्ति सुरक्षा कायम गर्न प्रहरी जिम्मेवारीका साथ खटिएको स्पष्ट पार्नुभएको छ । “एउटी चेलीलाई न्याय दिलाउन गरिएको आन्दोलनलाई नै शान्तिपूर्ण बनाउन र नागरिकलाई कानूनी शासनको प्रत्याभूति दिन खटिएकी एक होनहार राष्ट्रसेवक सुरक्षाकर्मी गुमाउनुपर्दा अत्यन्त दुःखित भएको छु”, मन्त्री घिमिरेले भत्रुभएको छ । उहाँले न्यायपूर्ण आन्दोलनलाई नै हिंसक बनाउन र बदनाम गर्नका लागि गरिने यस्ता घुसपैठप्रति सजग हुँदै जुनसुकै प्रकारका न्यायिक आन्दोलनलाई आपराधिक तत्वबाट मुक्त राख्न सबैमा हार्दिक अपिल पनि गर्नुभएको छ ।
“नागरिकको शान्ति सुरक्षाका लागि अहोरात्र खटिने प्रहरीमाथि नै ढुङ्गामुढा प्रहार गर्ने र अझ हत्यासम्म गर्ने घटनामा संलग्न जो कोही भए पनि तिनलाई कानूनी दायरामा ल्याउनका लागि सहयोग गर्न सबै सामाजिक सङ्घसंस्था, राजनीतिक दल तथा व्यक्तिहरूमा म हार्दिक आह्वान गर्दछु”, मन्त्री घिमिरेले विज्ञप्तिमा उल्लेख गर्नुभएको छ । रासस
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया