मिथिलाञ्चल सहित तराई मधेसमा आज चैते छठ पर्व मनाइँदै

काठमाण्डौंः मिथिलाञ्चल सहित तराई मधेसका जिल्लाहरूमा आज चैते छठ नियम निष्ठा तथा श्रद्धापूर्वक मनाइँदै छ ।

मङ्गलवारदेखि नहाखाय गरेर शुरु भएको चैत छठ पर्व अन्तर्गत बुधवार खरना तथा आज उदाउँदो सूर्यलाई प्रथम अर्घ दिने कार्यक्रम रहेको छ । अस्ताउँदो सूर्यलाई सन्ध्या अर्घ दिइन्छ भोलि शुक्रवार बिहान उदाउँदो सूर्यलाई दोस्रो पटक अर्घ दिएपछि चैते छठ पर्वको सम्पन्न हुनेछ ।

वर्षको दुई पटक सूर्यको उपासना गर्दै मनाइने छठ पर्वको विधि तथा प्रक्रिया समान किसिमको रहेको छ । कार्तिकमा मनाइने छठ पर्व मनाउनेको सङ्ख्या अत्यधिक भएपनि चैती छठ पर्व गर्नेहरूको सङ्ख्या न्यून भएपनि अहिले आएर बढ्न थालेको छ ।

चार दिनसम्म विधि विधान पूर्वक मनाइने यो पर्व परिवारको सुख शान्ति तथा समृद्धिको कामना सहित सन्तान प्राप्ति तथा छाला जन्य रोगबाट मुक्ति मिल्ने विश्वासका साथ मनाइन्छ ।

चैते छठको अर्घमा मुला, उखु, भण्टा, ठकुवा, भुसवा ,केरा, नरिवल, खाजा, मिष्ठान्न सहितका प्रसाद सामग्रीहरु सूर्यको उपासना गर्दै अर्पण गर्ने गरिन्छ । सन्ध्या अर्घ पश्चात् रात भरि व्रतालुहरू जागरण बसी भोलि पल्ट चैत्र शुक्ल सप्तमी तिथिका दिन उदाउँदो सूर्यलाई पुनः दोस्रो पटक अर्घ दिई पर्वको समापन गर्ने चलन छ । त्यस दिन प्रतिले ४८ भण्डा पछि व्रत तोडेर परना गर्ने अर्थात् खाना खाने गर्दछन् ।

जनकपुरको गंगासागर, अंर्गजा सागर, धनुष सागर, रत्नसागर, अग्निकुण्ड सहितका विभिन्न जलाशयहरूमा छठ पर्व गर्ने तथा हेर्ने दर्शनार्थीहरुको घुइँचो आज साँझ तथा भोलि बिहान रहने गरेका छन् । सबै घाटहरूको सरसफाइ तथा सरसजावट गर्ने काम छठ पूजा समितिहरूले गरेका छन् ।

प्रकृतिको पूजा तथा संरक्षण गर्ने पर्वको रुपमा रहेको चैते छठ पर्वले मानव र प्रकृति बीचको सम्बन्धलाई उजागर गर्ने गरेका छन् । गृष्म ऋतु तथा शरद रितुमा गरेर दुई पटक मनाइने छठ पर्वको गृष्म ऋतुको पर्वलाई निक्कै कठोर मान्ने गरिन्छ । गर्मी अत्यधिक हुने भएकाले जल पनि सेवन नगरेर मनाइने भएकाले कठोर मानिन्छ ।