१०औं एनएसए पौडी आइतबार

काठमाडौंः नेपाल पौडी संघको बार्षिक कार्यक्रम अनुसारको १०औं एनएसए कप खुला तथा उमेर समूह पौडी प्रतियोगिता आइतबार हुने भएको छ । प्रतियोगितामा ५४ स्वर्ण पदकका लागि ८४ महिला तथा १३७ पुरुष गरी २२१ खेलाडीको सहभागिता रहने संघले जनाएको छ ।

प्रतियोगितामा जुनियर खेलाडीहरुको हौसला अभिबृद्धि गर्ने उद्देश्यले जुनियर विधाका १० बर्ष, १२ बर्ष, १४ बर्ष र १७ बर्ष मुनिका प्रत्येक विधाका एक महिला र एक पुरुष खेलाडीलाई उमेर समूहको उत्कृष्ट खेलाडी घोषित गरिनुका साथै ट्रफीले सम्मान गरिने संघले जनाएको छ ।

मित्र राष्ट्र चीनमा आयोजना हुने १९औं एशियन प्रतियोगिताका लागि खेलाडी समेत रहेको यस प्रतियोगिताबाट खेलाडीले प्राप्त गरेको उच्चतम फिना अंकका आधारमा चार पुरुष र चार महिला खेलाडी छनोट गरिने संघका अध्यक्ष अशोक बज्राचार्यले जानकारी दिनुभयो ।

यस प्रतियोगिताका अवसरमा नेपालमा दुई बर्षअघि सम्पन्न १३औं दक्षिण एशियाली खेलकुद (साग) मा सर्वाधिक पदक जित्दै इतिहास रच्न सफल गौरिका सिंह लगायत अन्य खेलाडी र पदकधारीलाई नगद पुरस्कार सहित सम्मान गरिने संघले जनाएको छ ।