आईसीसी टी-२० विश्वकपमा आज तीन खेल हुँदै

काठमाण्डौंः आईसीसी टी–२० विश्वकप २०२२ अन्तर्गत आज बिहिबार तीन खेल हुँदैछन् । पहिलो खेल बंगलादेश तथा दक्षिण अफ्रीकाविरुद्ध अहिले बिहान ९ बजेदेखि सिड्नीमा प्रारम्भ हुँदैछ ।

दोस्रो खेल भारत तथा नीदरल्याण्डबीच हुनेछ । सिड्नी मै खेलिने यो खेल दिउँसो १ बजेदेखि प्रारम्भ हुनेछ । तेस्रो खेल पाकिस्तान तथा जिम्बाब्वेबीच साँझ ५ बजेदेखि पर्थमा खेलिंदैछ ।

भारतले नीदरल्याण्डसंग आफ्नो दोस्रो खेल खेल्न लागेको हो । दुबै टीमबीच यो खेल ऐतिहासिक सिड्नी क्रिकेट ग्राउण्डमा हुनेछ ।

भारतीय टीमले पहिलो खेलमा आफ्नो चीर प्रतिद्वन्दि पाकिस्तानलाई चार विकेटले पराजित गरेको थियो, जसका कारण भारत दोस्रो खेलमा समेत विजयी हुनका लागि उत्साहित देखिन्छ । नीदरल्याण्डको टीमले भने पहिलो खेलमै बंगलादेशविरुद्ध हारको सामना गर्नु परेको थियो ।

भारतीय टीमका बलिङ कोच पारस म्हाम्ब्रेले पाकिस्तानविरुद्ध खेल्ने टीम नै नीदरल्याण्डविरुद्ध मैदानमा उत्रिने संकेत गरेका छन् ।

नीदरल्याण्डको टीम खेलमा आश्चर्यजनक नतिजा निकाल्न सिपालु छ । सन् २००९ तथा २०१४ को विश्वकपमा नीदरल्याण्डले इङ्ल्याण्डलाई पराजित गरिसकेको छ ।