आयरल्यान्डलाई हराउँदै न्यूजिल्यान्ड सेमिफाइनलमा

काठमाण्डौः न्यूजिल्यान्डले अस्ट्रेलियामा जारी आईसीसी टी-ट्वान्टी क्रिकेट विश्वकपको सेमिफाइनलमा स्थान सुरक्षित गरेको छ । समूह एकअन्तर्गत एडिलेडमा भएको अन्तिम खेलमा आयरल्यान्डलाई ३५ रनले पराजित गर्दै न्यूजिल्यान्ड अन्तिम चारमा प्रवेश गरेको हो ।

न्यूजिल्यान्डले दिएको १ सय ८६ रनको लक्ष्य पछ्याएको आयरल्यान्डले निर्धारित २० ओभरमा 9 विकेट गुमाएर १ सय ५० रन मात्र जोड्न सक्यो । आयरल्यान्डका लागि पल स्टरलिङले ३७ तथा कप्तान एन्डी बालबिर्नीले ३० रन जोडे ।

न्यूजिल्यान्डका लागि लोकी फर्गुसनले सर्वाधिक ३ तथा टिम साउथी, मिचेल सान्टनर र इश सोधीले समान दुई-दुई विकेट लिए । यसअघि टस हारेर पहिले ब्याटिङ गरेको न्यूजिल्यान्डले निर्धारित २० ओभरमा ६ विकेट गुमाउँदै १ सय ८५ रन जोड्यो ।

न्यूजिल्यान्डका लागि कप्तान केन विलियम्सनले ३५ बलमा सर्वाधिक ६१ रनको योगदान गरे । फिन एलेनले ३२, डेरिल मेचिलले ३१ तथा डेभोन कोनवेले २८ रन बनाए । आयरल्यान्डका लागि जोश लिटल सर्वाधिक ३ विकेट लिए । उनले ह्याट्रिक समेत पुरा गरे । गारेथ डेलानीले दुई विकेट तथा मार्क अडायरले एक विकेट लिए ।