फिफा विश्वकपको अभ्यास खेलमा स्पेनको सहज जित

काठमाडौंः कतार फिफा विश्वकप अघिको मैत्रीपूर्ण खेलमा स्पेनले जोर्डनलाई ३–१ ले पराजित गरेको छ । बिहीबार राति युवा खेलाडीलाई प्राथमिकतामा राखेको लुइस इन्रिकेको स्पेनले सहज जित निकालेको छ । स्पेनको जितमा अन्सु फाती, गावी र निको विलिअम्सले एक एक गोल गरेका थिए ।

जोर्डनका लागि इन्जुरी समयमा हाम्जा अल डाराडौरले एक गोल फर्काएका थिए । खेलको १३ औँ मिनेटमा फातीले अग्रता दिलाए । ५६ औँ मिनेटमा गावीले दोस्रो गोल गरेका थिए । निकोले खेलको ८४ औँ मिनेटमा गोल गर्दा स्पेन सहज जित निकाल्न सफल भयो ।

समूह इ मा स्पेनसहित कोस्टारिका, जर्मनी र जापान रहेका छन् । स्पेनले २२ नोभेम्बरमा कोस्टारिकासँग खेल्दै विश्वकप सुरु गर्नेछ ।