अध्यादेश फिर्ता नलिए आन्दोलनको आँधीबेहरी ल्याउने तरुण दलको चेतावनी

काठमाडौँ । नेपाल तरुण दलले सरकारको सिफारिसमा राष्ट्रपतिले जारी गरेका दुई अध्यादेश फिर्ता नलिए आन्दोलनको आँधीबेहरी ल्याउने चेतावनी दिएको छ ।

तरुण दलका अध्यक्ष जितजंग बस्नेतले एक विज्ञप्ति जारी गरेर राष्ट्रपति विद्यादेवी भण्डारीले पास गरेका राजनीतिक दल र संव्रधानिक परिषद् सम्बन्धी दुुई अध्याधेश आपत्तिजकर र गैह्रजिम्मेवार रहेकोले फिर्ता लिन माग गरेका छन् ।

तत्काल अध्यादेश फिर्ता नलिए आन्दोलनको आँधीबेहरी श्रृजना हुने उनको चेतावनी छ ।

‘स्वास्थ्य सामग्री खरिदमा भ्रष्टाचार गरी पाप र धर्मको ख्याल नगरेको केपी सरकारले फेरि अर्को पछिल्लो काण्डको रुपमा जनतालाई लकडाउनको बाहनामा घरभित्र थुनेर विधेयक ल्याई अधिनाकतातर्फ मुलुक धकेल्ने सपना देख्नु दिवास्वप्न भएको तरुण दल ठहर गर्दै लोकतन्त्री विरोधी विधेयक तत्काल फिर्ता लिन समेत अनुरोध गर्दछ’, विज्ञप्तिमा भनिएको छ, ‘साथै देश, जनता र लोकतन्त्र विरोधी बिधेयक फिर्ता नलिए तरुण दल लोकतन्त्र र नेपाली जनताका पक्षमा आन्दोलनको जस्तोसुकै आँधीबेहरी ल्याउन समेत पछि नपर्ने चेतावनी दिन चाहान्छु ।’

रास्ट्रपतिबाट पारित भएको संविधानको मर्म विपरित, गलत राजनीतिक अभ्यासले अस्थिरता संगै लोकतन्त्र धरापमा पर्न सक्ने हुँदा देश र नागरिकका लागि दुर्भाग्यपूर्ण अवस्थाको चित्रण भएको तरुण दलले ठहर गरेको छ ।

‘संसद छल्दै सरकारले पेश गर्ने र राष्ट्रपतिले सदर गर्ने गरी ल्याईएका अध्याधेशहरुले अस्थिरता निम्तिनेतर्फ मुलुक गएकोमात्र नभई प्रतिपक्षी दल बिना नै काम गर्न खोज्ने सरकारी रणनीतिले कम्युनिष्टले जितेमा मुलुक अधिनायकत्वतिर लम्किन्छ भन्ने काँग्रेसको निर्बाचन अगाडीको आँकलन सहि हुँदै गएको देखिएको छ’, बस्नेतले जारी गरेको विज्ञप्तिमा उल्लेख छ ।

नेकपा नेतृत्वको सरकारको नालायक सावित भएको र उनीहहरुको यस्तै उल्टो मतीले गर्दा नेकपा पनि सिद्धिने र सरकारको पनि आयु समाप्त हुने शुरुवात भएको देखिएको तरुण दलले जनाएको छ ।