काँग्रेसको १४औं महाधिवेशन फाल्गुन ७ मै गर्न पदाधिकारीबिच सहमतिः केन्द्रीय समितिको बैठक मंगलबार डाकियो

काठमाण्डौं: नेपाली काँग्रेसको पदाधिकारी बैठकले पार्टीको १४औँ महाधिवेशन निर्धारित समयमै गर्न कार्यतालिका हेरफेर गर्ने विषयमा केन्द्रिय कार्यसमितिको बैठकबाट निर्णय लिने सहमति गरेको छ ।

आइतबार बसेको काँग्रेसका पदाधिकारी र पूर्वपदाधिकारीको बैठकले केन्द्रिय कार्यसमिति बैठकबाट पार्टी महाधिवेशनबारे निर्णय लिने सहमति गरेको हो। नेपाली काँग्रेस केन्द्रीय कार्यसमितिको बैठक यही असार १६ गते मंगलबार दिउँसो १ः०० बजे बस्ने समेत तय भएको छ ।

पार्टीको केन्द्रीय कार्यालय सानेपामा बस्ने बैठकमा कोभिड-१९ को सङ्क्रमणका कारण प्रभावित पार्टीको १४औँ महाधिवेशन र अधिवेशनको कार्यतालिका बारेमा छलफल हुने बताइएको छ ।

पार्टीको पदाधिकारी र पूर्वपदाधिकारीको आईतबार बसेको बैठकले काँग्रेसको १४औँ महाधिवेशन निर्धारित समय आगामी फागुन ७ देखि १० गतेसम्म नै काठमाण्डौँमा गर्ने र अन्य अधिवेशनका तालिकामा सामान्य हेरफेर गर्ने निर्णय गरेको थियो । सो निर्णयलाई केन्द्रीय समितिको आगामी बैठकले पारित गर्ने पार्टी कार्यालयले जनाएको छ ।

काँग्रेसले गत माघ १३ गतेको केन्द्रीय समिति बैठकबाट पार्टी मातहतका निकायका अधिवेशन र १४औँ महाधिवेशन सम्पन्न गर्न कार्यतालिका सार्वजनिक गरेको थियो । काँग्रेसको १३औँ महाधिवेशन २०७२ साल फागुन २० देखि २३ गतेसम्ममा काठमाडौँमा भएको थियो ।

काँग्रेसका सबै तहका पदाधिकारी तथा सदस्यको पदावधि चार वर्ष हुने विधानमा उल्लेख भए पनि विधानकै अर्काे व्यवस्थाअनुसार एक वर्ष समयावधि यसअघि नै थप गरिसकिएको छ ।