राजनीति सफा नभई मुलुक नबन्ने उपप्रधानमन्त्री श्रेष्ठको दाबी

काठमाडौँः उपप्रधानमन्त्री तथा परराष्ट्रमन्त्री नारायणकाजी श्रेष्ठले राजनीति सफा नभई देश नबन्ने दाबी गरेका छन् । शनिबार अन्तर्राष्ट्रिय सहकारी दिवसको अवसर पारेर काठमाडौंमा आयोजित एक कार्यक्रममा बोल्दै उनले राजनीति सफा नभई मुलुकमा विद्यमान कुनैपनि समस्या समाधान नहुने बताए ।

उनले मुलुकमा सहकारी क्षेत्रमा देखिएको समस्या पनि राजनीतिक दलहरुको संरक्षणको कारण भएको बताए । राजनीतिक दल र नेताहरुले सहकारीका सञ्चालकहरुलाई संरक्षण गर्न खोज्दा सहकारीमा समस्या देखिएको उपप्रधानमन्त्री श्रेष्ठको जिकिर थियो ।

उनले भने, ‘नेपालको राजनीतिको समस्या म यहाँ चर्चा गर्न चाहन्नँ । त्यो राजनीति सफा नभईकन अरु समस्या समाधान हुने वाला छैन । त्यसैले मैले बारम्बार भन्ने गरेको छु–राजनीति सफा नगरीकन यो देश बन्दैन भन्ने कुरा अत्यन्तै महत्वको साथ आत्मासात गर्नुपर्ने अहिलेको अवस्था हो । जतिसुकै गरेपनि राजनीतिले मुख्य भुमिका खेल्छ । सहकारीमा नै यस्तो समस्या किन आयो ? एउटा त अनुगमन भएन । दोस्रो ती सहकारीका संचालक, मालिकहरु आ–आफ्नो पार्टी र नेताका छन् । तिनलाई त रक्षा गर्नुपर्छ भनेर लागिएको छ ।’

उपप्रधानमन्त्री श्रेष्ठले सहकारी समस्या समाधानका लागि भईरहेका प्रयासप्रति पनि असन्तुष्टि व्यक्त गरे ।