दुई तिहाइको सरकारलाई बाढीपहिरोले नंगाइदियो : सांसद गोसाईं

काठमाण्डौंः नेमकिपा नेता एवं बागमती प्रदेशका सांसद सुरेन्द्रराज गोसाईंले दुई तिहाइको सरकारलाई बाढीपहिरोले नंगाइदिएको भन्दै कडा आलोचना गरेका छन्।

उनले देशभरि बाढी पहिरोमा परी तीन सयभन्दा बढी गरिब नेपाली जनताको ज्यान गुम्दा पनि सरकारले कुनै ठोस कदम चाल्न नसक्दा सरकारको असक्षमता स्पष्ट भएको बताए।

शुक्रबार भक्तपुरमा एक कार्यक्रमको उद्घाटन गर्दै सांसद गोसाईंले बाढी पहिरोबाट हजारौं मानिस घाइते हुँदा समेत सरकार मूकदर्शक बनेको आरोप लगाए।

“जनताको जिउधनको सुरक्षा दिने जिम्मेवारी लिने गृहमन्त्री लाटोजस्तै बनेका छन्,” उनले भने, “गृहमन्त्री लेखक नामका भए पनि व्यवहारमा बाढी पहिरोमा केही गर्न नसक्ने निरीह बनेका छन्।”

गोसाईंले प्रधानमन्त्रीको पनि आलोचना गर्दै देशभरि बाढीपहिरोले कहर मच्चाउँदा प्रधानमन्त्री विदेशमा दुःख व्यक्त गरेर चुप लागेर बसेको बताए।

ठूला राजनीतिक दलका कार्यकर्ताहरू विपद्को समयमा कहाँ हराए भन्ने प्रश्न गर्दै उनले सरकारको लापरबाहीप्रति गहिरो असन्तुष्टि जनाए। नागरिक