झिल्टुङ क्रसकन्ट्री दौड प्रतियोगितामा बुढा र तामाङ उत्कृष्ट

त्रिशूली (नुवाकोट), ६ माघ : नवौ झिल्टुङ्ग क्रसकन्ट्री दौड प्रतियोगितामा लामो दुरीको दौडतर्फ पुरुषमा अर्जुन बुढा र महिलामा विमला तामाङ विजयी हुनुभएकी छन् ।

प्रतियोगितामा १३ दशमलव पाँच किलोमिटर दुरीको खुला महिलातर्फ १ घण्टा १३ मिनेट ३० सेकेण्डमा पूरा गर्दै तामाङ प्रथम हुनुभयो । उक्त दुरी १ घण्टा १३ मिनेट ४३ सेकेण्डमा पूरागर्दै नेपाल प्रहरीको निमा लाक्पा शेर्पा दोश्रो र एकघण्टा १३ मिनेट ५३ सेकेण्डमा पूरा गर्दै रोल्पाकी आश्मा विश्वकर्मा तेस्रो हुनुभयो ।

१३ दशमलव पाँच किमी खुला पुरुषतर्फ त्रिभुवन आर्मी क्लबका अर्जुन बुढा ५३ मिनेट २६ सेकेण्डमा पूरा गर्दै पहिलो हुनुभयो । सोही दुरी ५३ मिनेट ४५ सेकेण्डमा पूरा गर्दै सोही क्लबका टङ्क कार्की दोस्रो र ५७ मिनेट ३४ सेकेण्डमा पूरा गर्दै ललितपुरका प्रविण लिम्बू तेस्रो हुनुभयो ।

स्थानीय पुरुषमा बिमल थापा मगरले एक घण्टा ४ मिनेटमा निर्धारित १३ दशमलव पाँच किमी पार गर्दै प्रथम हुनुभयो । उक्त दुरीअन्तर्गत ४५ वर्षमाथिका पुरुष भेट्रान प्रतिस्पर्धामा नेपाल राष्ट्र बैंकबाट सहभागी रेवत दाहाल एक घण्टा १० मिनेटमा पूरा गर्दै प्रथम हुनुभयो ।

प्रतियोगिताअन्तर्गत चार दशमलव पाँच किमी खुला जुनियर छात्रतर्फ काठमाडौँका नवराज बानियाँ र छात्रातर्फ विजेश्वरी ज्ञान मन्दिर सैनिक महाविद्यालयका आयुश्मा आचार्य प्रथम हुनुभयो । सोही दुरीमा स्थानीय विद्यालयतका विद्यार्थीको प्रतिस्पर्धामा छात्रतर्फ महादेव माविका गोकुल कुँवर र छात्रातर्फ इन्द्रेश्वर आधारभूत विद्यालयका सकिना तामाङले प्रथम स्थान हासिल गर्नुभयो ।

चार दशमलव पाँच किमी दुरीको दौड प्रतियोगितामा आमा समूहको तर्फबाट सनिता श्रेष्ठ र सोही दुरीमा ४५ वर्षमाथीका स्थानीय हजुरबा र बा समूहको तर्फबाट चन्द्रमान श्रेष्ठ प्रथम हुनुभयो ।