सभापति कप फुटबल : एनआरटीले फ्रेन्ड्सलाई ३–१ गोलले हरायो

काठमाडौँ, माघ १३ गते । न्यूरोड टिम (एनआरटी) सभापति कप फुटबल प्रतियोगिताको सेमिफाइनलमा प्रवेश गरेको छ । दशरथ रङ्गशालामा आइतबार भएको खेलमा एनआरटीले फ्रेन्ड्सलाई ३–१ गोलले हरायो ।

एनआरटीको जितमा कप्तान अन्जन विष्टले दुई गोल गर्नुभयो । अन्जन प्लेयर खफ दि म्याच हुनुभयो । अर्को गोल रिचार्ड विल्सनले थप्नुभयो । फ्रेन्ड्सका लागि विवेक पौडेलले सान्तवना गोल फर्काउनुभयो । यससँगै प्रतियोगिताको सेमिफाइनल समिकरण पूरा भएको छ ।

सेमिफाइनलमा एनआरटीले मङ्गलबार आयोजक टिम नेपाल लोकतान्त्रिक खेलकुद सङ्घ बागमती प्रदेशसँग प्रतिस्पर्धा गर्नेछ । यसअघि अर्को सेमिफाइनलमा सामेबार सङ्कटा र मच्छिन्द्र क्लबबिच प्रतिस्पर्धा हुनेछ ।

नेपाली काँग्रेस निकट लोकतान्त्रिक खेलकुद सङ्घ महाधिवेशन निर्देशन समितिको आयोजना गरेको प्रतियोगिताको विजेता टिमलाई २६ लाख र उपविजेतालाई १३ लाख रुपियाँ पुरस्कार प्रदान गरिनेछ । यो नेपाली नकआउट फुटबलको सर्वाधिक पुरस्कार राशी हो ।

यस्तै प्रत्यके खेलको प्लेयर अफ दि म्याचलाई १५ हजार, सर्वोत्कृष्ट खेलाडीलाई ७५ हजार, उत्कृष्ट गोलरक्षकलाई ५० हजार, सर्वाधिक गोलकर्तालाई ५० हजार र उदीयमान खेलाडीलाई २५ हजार रुपियाँ प्रदान गरिने आयोजकले जनाएको छ ।