फोर नेसन्सको पहिलो खेल : लेबनानमाथि म्यानमारको अपेक्षित जित

काठमाडौँ : म्यानमारले फोर नेसन्सको पहिलो खेलमा सोमबार दशरथ रंगशालामा लेवनानमाथि ३–१ को जित निकालेको छ । प्रतियोगितामा शीर्ष वरीयताको म्यानमारको यो अपेक्षित जित रह्यो, तर यसका लागि उसले संघर्ष भने गर्नु परेको थियो ।

गोलरहित बराबरीपछि चारै गोल दोस्रो हाफमा भएका थिए । लेबनानी गोलरक्षक मार्सेली स्काकीले शृंखलाबद्ध बचाउ गरेपछि म्यानमारको जित कम गोल अन्तरको रह्यो । खेलको पहिलो गोल विन थेन्गीथुनले ५६ औं मिनेटमा गरिन् र यो उत्कृष्ट रह्यो ।

उनले पेनाल्टी एरियाको ठीक बाहिरबाट गरेको प्रहार गोलमा परिणत भएको थियो । लेबनानले ६०औं मिनेटमा बराबरी गोल फर्काएको हो । उसका लागि लैजा स्कन्डरले यो गोल गरिन् । लैलाले म्यारमारकी गोलरक्षक म्यो म्याम्यालाई बिट गर्दै खाली पोस्टमा बललाई दिशा दिइन् ।

त्यसपछि म्यानमारले दुई गोल थपेको हो । यसमध्ये स्वेय यी टुनले हेडबाट ७२ औं मिनेटमा गोल गरिन् । म्याट नोए खिनाले ७५ औं मिनेटमा रिबाउन्डमा तेस्रो गोल थपिन् । यस नतिजासँगै म्यानमारको तीन अंक भएको छ र चार टिममध्ये शीर्षमा रह्यो । लेबनान भने शून्य अंकमा रह्यो । सोमबारको बेलुका ६ बजे हुने खेलमा नेपालले किर्गिस्तानको सामना गर्दैछ ।