पूर्वराजा ज्ञानेन्द्रले पहलगाम आक्रमणप्रति दिए श्रद्धाञ्जली, हिन्दू समुदाय लक्षित हमलाको भर्त्सना

काठमाडौं, १३ वैशाख । पूर्वराजा ज्ञानेन्द्र शाहले भारतको जम्मु कश्मीरस्थित पहलगाममा भएको आतंककारी आक्रमणमा मारिएका नागरिकप्रति श्रद्धाञ्जली व्यक्त गरेका छन्। शनिबार एक समवेदना सन्देश जारी गर्दै उनले घटनामा ज्यान गुमाएका एक नेपालीसहित सबै दिवंगतप्रति गहिरो श्रद्धाञ्जली अर्पण गरेका हुन् ।

पूर्वराजाले भारत सरकारप्रति पनि गहिरो सहानुभूति व्यक्त गरेका छन्। उनले हिन्दू समुदायलाई नै लक्षित गरी भएको उक्त घटनाको जति निन्दा गरे पनि कम हुने बताउँदै, यस्तो अमानवीय कार्यको विश्वव्यापी भर्त्सना हुनुपर्ने आवश्यकता औंल्याएका छन्।

उनको सन्देशमा भनिएको छ, “बसुधैव कुटुम्बकम्”को आदर्श अवलम्बन गर्ने सनातनी वैदिक हिन्दू धर्मावलम्बीहरूको दिव्य मानवीय मान्यता विपरीत यस्तो जघन्य अपराध गर्नु सर्वथा धर्मविरुद्धको पाप कर्म हो भन्ने हाम्रो ठम्याइ छ। सम्पूर्ण हिन्दू समुदायलाई मर्माहत तुल्याउने यस्ता घटनाको विश्वव्यापी निन्दा र भर्त्सना हुनैपर्छ।”

पूर्वराजा शाहले यस घटनाबाट पीडित परिवारप्रति समवेदना व्यक्त गर्दै घाइतेहरुको शीघ्र स्वास्थ्य लाभको कामना पनि गरेका छन्।