स्काइपको यात्रा टुंगियो : मे ५ देखि सेवा पूर्ण रूपमा बन्द

काठमाडौं । इन्टरनेटमार्फत सस्तो, सहज र भरपर्दो रूपमा आवाज तथा भिडियो संवाद गर्न मिल्ने स्काइप सेवा मे ५, २०२५ बाट पूर्ण रूपमा बन्द भएको छ। एक समय नेपाली समाजमा ‘विदेशमा भएका आफन्तसँग कुरा गर्ने सबैभन्दा भरपर्दो उपाय’ को रूपमा चिनिएको स्काइप अन्ततः प्रविधिको तीव्र प्रतिस्पर्धामा टिक्न नसकेर बन्द भएको हो।

२००३ मा सुरु भएको यो सेवा विशेषगरी प्रवासी नेपालीबीच अत्यन्त लोकप्रिय थियो। अझ, २०७२ सालको विनाशकारी भूकम्पका बेला स्काइपले नेपाललाई निःशुल्क कल सुविधा प्रदान गर्दै संकटमा परेकाहरूसँग अन्तरक्रिया गर्न सघाएको थियो। उक्त समय स्काइप केवल एप मात्र नभई भावनात्मक सहारा पनि बनेको थियो।

त्यतिबेला स्काइपसँग ३० करोड सक्रिय प्रयोगकर्ता थिए। तर समयसँगै प्रविधिमा आएको तीव्र विकास र प्रतिस्पर्धाले स्काइपलाई पन्छ्याउन थाल्यो। जुम, व्हाट्सएप, फेसटाइम र माइक्रोसफ्ट टिम्स जस्ता सेवाहरूले थप सहज, छरितो र मोबाइलमैत्री सुविधा दिएपछि स्काइप क्रमशः ओझेलमा पर्न थाल्यो।

विश्लेषकहरूका अनुसार, स्काइप माइक्रोसफ्टले अधिग्रहण गरेपछि त्यसको विकासमा पर्याप्त ध्यान नदिइएको, जटिल प्रयोगकर्ता अनुभव, र नयाँ प्रविधिहरूमा ढिलो अपनत्व लिएको कारण पनि यसले प्रतिस्पर्धा गर्न नसकेको हो।

हालका लागि प्रयोगकर्ताले आफ्नो डाटा २०२६ जनवरीसम्म डाउनलोड गर्न सक्ने व्यवस्था गरिएको छ।

स्काइपको बन्दसँगै एक प्रविधि–यात्रा टुंगिएको छ। यो घटना केवल एउटा एपको अन्त्य होइन, सँगसँगै लाखौँ प्रवासी नेपालीहरूको भावनात्मक सहयात्रा र प्रविधिमा आधारित सम्बन्धको एउटा अध्याय पनि बन्द भएको संकेत हो।