नयाँ तलबमान न्यूनतम ३८ हजार ८६२ रुपैयाँ कायम गरिनुपर्ने कर्मचारीको माग

काठमाडौं, जेठ ५ । नेपाल निजामती कर्मचारी संगठनले आगामी आर्थिक वर्षको बजेटमा समावेश गरिनुपर्ने ३८ बुँदे सुझावपत्र सरकारलाई पेश गरेको छ।

संगठनका अध्यक्ष भवानी न्यौपाने दाहालसहितको टोलीले आइतबार उपप्रधान तथा अर्थमन्त्री विष्णुप्रसाद पौडेललाई भेटेर मौद्रिक तथा गैर मौद्रिक पक्षमा आधारित मागहरू प्रस्तुत गरेका हुन्।

संगठनले राष्ट्रसेवक कर्मचारीहरूको मनोबल उच्च राख्न, सेवाप्रवाहलाई प्रभावकारी बनाउन, तथा सुशासन प्रवर्द्धन गर्नका लागि तलब, भत्ता, सेवा-सुविधा र कार्यस्थलमा सुधारको खाँचो औँल्याउँदै विभिन्न ठोस मागहरू अघि सारेको हो।

संगठनले बजार मूल्यलाई आधार मान्दै आधारभूत तलबमान ३८ हजार ८६२ रूपैयाँ कायम गर्न माग गरेको छ । कार्यालय सहयोगी र मुख्य सचिवबीचको अनुपातलाई पहिलो चरणमा १:३.५ अनुपात पुर्‍याई तेस्रो चरणमा १:५ को अनुपात बनाउन पनि माग गरिएको छ ।

आफ्नो र परिवारको नाममा घर नहुने कर्मचारीलाई तलब स्केलको निश्चित प्रतिशत बहालबापत उपलब्ध गराइनुपर्ने, कर्मचारी र परिवारका सदस्यको उपचार सहुलीयत, खाजा भत्ता, छोराछोरीलाई सरकारी विद्यालयमा पढाउन प्रोत्साहनका लागि सन्ततिलाई मासिक भत्तालगायतको व्यवस्था गर्न पनि माग गरिएको छ ।