संयुक्त जनआन्दोलन समितिद्वारा घोषित उपत्यका बन्द फिर्ता

काठमाडौं, जेठ १९ । संयुक्त जनआन्दोलन समितिले आज सोमबार (जेठ १९ गते) का लागि घोषणा गरिएको उपत्यका बन्द कार्यक्रम फिर्ता लिएको छ। समितिका संयोजक नवराज सुवेदीको हस्ताक्षरमा जारी विज्ञप्तिमा आइतबारको प्रदर्शनका क्रममा पक्राउ परेका नेताहरू रिहा भइसकेका कारण बन्द कार्यक्रम आवश्यक नरहेको उल्लेख गरिएको छ।

यसअघि आइतबार, राजसंस्थाको पुनःस्थापनाका मागसहित काठमाडौंको नारायणचौरमा गरिएको प्रदर्शनबाट राप्रपा नेपाल अध्यक्ष कमल थापा, सांसद दीपक सिंहसहित आठ जना पक्राउ परेका थिए। उनीहरू मध्ये सात जना साँझसम्म रिहा गरिए भने एक जनालाई हिरासतमा राखिएको थियो।

समितिको विज्ञप्तिमा भनिएको छ, “सरकारको दमनको विरोधमा घोषित उपत्यका बन्द कार्यक्रम, गिरफ्तार नेताहरूको रिहाइ भइसकेका कारण फिर्ता गरिएको छ।”