बायर्नलाई हराउँदै पिएसजी क्लब विश्वकपको सेमिफाइनलमा

काठमाडौँ, असार २२। फ्रेन्च क्लब पेरिस सेन्ट जर्मेन (पिएसजी) क्लब विश्वकपको सेमिफाइनलमा प्रवेश गरेको छ। गएराति सम्पन्न क्वाटरफाइनल खेलमा जर्मन क्लब बायर्न म्युनिखलाई २–० गोलले पराजित गर्दै पिएसजी अन्तिम चारमा पुगेको हो।

खेलको ७८ औं मिनेटमा डिजायर डोउले पिएसजीका लागि पहिलो गोल गर्दै टोलीलाई अग्रता दिलाए भने इन्जुरी समयको दोस्रो मिनेटमा ओस्माने डेम्बेलेले दोस्रो गोल थप्दै जित पक्का गरे। पिएसजीले सुरुदेखि नै आक्रामक प्रदर्शन गर्दै बायर्नको डिफेन्सलाई दबाबमा राखेको थियो।

यद्यपि खेलमा केही नाटकीय क्षणहरू पनि देखिए। ८२ औं मिनेटमा पिएसजीका विलियन पाचोले रातो कार्ड पाए भने अन्त्यतिर, ९०+२ औं मिनेटमा लुकास हर्नान्डेज पनि रातो कार्ड खाँदै मैदान बाहिरिए।

यो जितसँगै पिएसजीले सेमिफाइनलको यात्रा तय गरेको छ र अब उसले युरोपेली फुटबलको अर्को शक्तिशाली क्लब रियल मड्रिडसँग भिड्नेछ। फुटबलप्रेमीहरूका लागि अबको सेमिफाइनल निकै रोमाञ्चक हुने अपेक्षा गरिएको छ।