त्रिभुवन विश्वविद्यालयले अध्ययन बिदा दुरुपयोग गर्नेबाट उठ्ने रकम निवृत्तिभरण कोषमा राख्ने

काठमाडौँ । त्रिभुवन विश्वविद्यालय (त्रिवि) ले अध्ययन बिदाको दुरुपयोग गर्ने शिक्षक तथा कर्मचारीबाट असुल उपर हुने रकमलाई निवृत्तिभरण कोष वृद्धिका लागि प्रयोग गर्ने निर्णय गरेको छ।

आर्थिक वर्ष २०८२/८३ को बजेटमार्फत त्रिविले बिदा लिई तोकिएको उपाधि हासिल नगरेका वा अध्ययनपछि पुनः सेवामा नफर्किएका शिक्षक–कर्मचारीबाट उठाइने रकमलाई निवृत्तिभरण कोषको स्रोतका रूपमा प्रयोग गर्ने उल्लेख गरेको हो।

त्रिवि मातहतका विभिन्न निकायहरूबाट उच्च शिक्षा अध्ययनको नाममा बिदा लिई विदेश गएर नफर्कने वा अध्ययन नै पूरा नगरी फर्किने प्रवृत्तिले गम्भीर समस्या निम्त्याएको भन्दै विश्वविद्यालयले यस विषयमा छानबिन समिति गठन गरेको थियो। छानबिन समितिको प्रतिवेदन अनुसार करिब ४ सय प्राध्यापकले बिदाको दुरुपयोग गरेको पाइएको छ।

ती प्राध्यापकहरूले औसतमा ५ वर्षसम्म अध्ययन बिदा लिएका थिए, सो अवधिमा तलब भत्ता समेत लिने गरे पनि अन्त्यमा सेवामा नफर्किएको विश्वविद्यालयको निष्कर्ष छ।

त्रिविको अनुमानमा बिदा दुरुपयोग गर्नेबाट करिब २ अर्ब रुपैयाँ बराबरको रकम असुल उपर गर्न सकिने देखिएको छ। यही रकमलाई त्रिविले वित्तीय स्रोतका रूपमा प्रयोग गर्ने रणनीति बनाएको हो।

विश्वविद्यालयले बिदा दुरुपयोग गर्नेहरूमाथि कारबाही प्रक्रिया पनि अघि बढाएको जनाएको छ। त्रिविका अनुसार यसअघि अध्ययन बिदालाई अनुगमन तथा प्रतिवेदन दिने प्रणाली कमजोर भएकाले यस्तो समस्या उत्पन्न भएको थियो।