साफ महिला यू-२० च्याम्पियनसिपमा श्रीलंकाविरुद्धको खेलमा नेपाल विजयी

काठमाडौँ । दक्षिण एसियाली फुटबल महासंघ (साफ) महिला यू-२० च्याम्पियनसिपमा नेपाल श्रीलंकाविरुद्धको खेलमा विजयी भएको छ। बंगलादेशको ढाकास्थित बसुन्धरा किङ्स इरिनाको अभ्यास मैदानमा आज (बिहीबार) भएको खेलमा नेपालले श्रीलंकालाई ७-० गोलअन्तरले पराजित गरेको हो।

यसअघि पनि पहिलो खेलमा नेपालले श्रीलंकालाई समान ७-० गोल अन्तरले नै हराएको थियो। योसँगै नेपालले चार खेलबाट ९ अंक जोडेको छ। चार खेल खेलेको श्रीलंका भने अंकविहीन छ।

श्रीलंकाविरुद्धको खेलमा आज (बिहीबार) पहिलो हाफमा चार गोल गरेको नेपालले दोस्रो हाफमा तीन गोल थप्यो। नेपालका लागि कुसुम खतिवडा र समीक्षा मगरले समान दुई/दुई गोल गरे। पूर्णिमा राई, बिर्सना चौधरी र सरिता नाथले समान एक-एक गोल गरे।

मध्यान्तरपछि खेलको ६६औँ मिनेटमा बिर्सनाले पेनाल्टीमार्फत गोल गर्दै नेपाललाई ५-० गोलको अग्रता दिलाइन्। खेलको ७४औँ मिनेटमा समीक्षाले गोल गरिन्। खेलको ७८औँ मिनेटमा समीक्षाले नै व्यक्तिगत दोस्रो गोल गर्दै ७-० गोलअन्तरले विजयी दिलाइन्।

नेपालले अब शनिबार भुटानसँग खेल्नेछ।