राजर्षिजनक विश्वविद्यालयको परीक्षा नियन्त्रकमा प्राडा महतो नियुक्त

जनकपुरधाम । राजर्षिजनक विश्वविद्यालयले केन्द्रीय परीक्षा सञ्चालन तथा अभिलेख केन्द्रको परीक्षा नियन्त्रक पदमा प्राडा श्यामकिशोर महतोलाई आज नियुक्त गरेको छ ।

उक्त विश्वविद्यालयको कार्यकारी परिषद्को निर्णय अनुसार उहाँलाई  चार वर्षका लागि परीक्षा नियन्त्रक पदमा नियुक्त गरिएको विश्वविद्यालयका रजिष्ट्रार सत्यनारायण साहद्वारा जारी पत्रमा जनाइएको छ । सो पत्रमा राजर्षिजनक विश्वविद्यालयको ऐन तथा नियमावली, २०७५ अनुसार महतोलाई काम गराउने उल्लेख गरिएको छ ।

जनकपुरधामस्थित विश्वविद्यालयको परीक्षा नियन्त्रक पदमा पदभार ग्रहण गर्दै उहाँले यस विश्वविद्यालयले लिने परीक्षालाई मर्यादित तथा व्यवस्थित गराउँदै लैजाने प्रतिबद्धता जनाउनुभयो । विश्वविद्यालयबाट तोकिएको तालिका अनुसार परीक्षा सञ्चालन गराउने उहाँले बताउनुभयो ।

धनुषाको सबैला नगरपालिका–३ का स्थानीय बासिन्दा प्राडा महतोले तथ्याङ्कशास्त्रमा पटना विश्वविद्यालयबाट विद्यावारिधि गर्नुभएको छ । उहाँ विगत २८ वर्षदेखि अध्यापन क्षेत्रमा कार्यरत हुनुहन्छ । यसअघि उहाँ उक्त विश्वविधालयको डिनसमेत हुनुभएको थियो । रासस