प्राइम कमर्सियल बैंकको नाफा १४ प्रतिशत बढ्यो

काठमाडौं । प्राइम कमर्सियल बैंकको खुद नाफा गत आर्थिक वर्षमा १४.८ प्रतिशतले वृद्धि भएको छ। बैंकले सार्वजनिक गरेको अपरिस्कृत वित्तीय विवरणअनुसार बैंकको खुद नाफा ३ अर्ब ४७ करोड रुपैयाँबाट बढेर ४ अर्ब २ करोड रुपैयाँ पुगेको हो।

खुद ब्याज आम्दानीमा वृद्धि नै नाफा वृद्धिको प्रमुख कारण बनेको बैंकले जनाएको छ। अघिल्लो आर्थिक वर्षमा ७ अर्ब ८८ करोड रुपैयाँ रहेको खुद ब्याज आम्दानी गत आर्थिक वर्षमा बढेर ८ अर्ब ८२ करोड रुपैयाँ पुगेको छ। त्यस्तै, बैंकको नोक्सानी व्यवस्थापन रकम (इम्पेरिमेन्ट चार्ज) अघिल्लो वर्षको १ अर्ब ६३ करोड रुपैयाँबाट घटेर १ अर्ब ४१ करोड रुपैयाँमा सीमित भएको छ।

गत आर्थिक वर्षमा बैंकको वार्षिक प्रतिसेयर आम्दानी २० रुपैयाँ ७४ पैसा रहेको छ। असार मसान्तसम्म बैंकको वितरणयोग्य नाफा २ अर्ब ७८ करोड रुपैयाँ पुगेको छ भने प्रतिसेयर वितरणयोग्य नाफा १४ रुपैयाँ ३३ पैसा हो। प्रतिसेयर नेटवर्थ १७३ रुपैयाँ रहेको बैंकको अन्तिम सेयर मूल्य २५०.७४ रुपैयाँमा कारोबार भएको छ।