नेपाल शिक्षक महासंघद्धारा चरणवद्ध आन्दोलनको घोषणा

काठमाडौं, ६ भदौ । विद्यालय शिक्षक विधेयकमा आफ्ना माग सम्बोधन नभएको भन्दै नेपाल शिक्षक महासंघले भदौ ९ गतेदेखि चरणबद्ध आन्दोलन गर्ने घोषणा गरेको छ।

महासंघका अनुसार स्थायी शिक्षकको बढुवा, अध्यापन अनुमति पत्रको अवधि थप, विद्यालय कर्मचारीको पद–बेतन सुनिश्चितता, अस्थायी–करार शिक्षकका लागि आन्तरिक प्रतिस्पर्धा र शिक्षण काउन्सिलको व्यवस्था जस्ता माग विधेयकमा समेटिन नसकेपछि आन्दोलन अपरिहार्य भएको हो।

कार्यक्रमअनुसार भदौ ९ गते प्रधानमन्त्री, शिक्षामन्त्री र दलका प्रमुख सचेतकलाई ध्यानाकर्षण पत्र बुझाइने, भदौ ११ देखि २० सम्म पार्टी कार्यालयमा धर्ना दिने, भदौ १३ गते पालिकामा र भदौ १५ गते जिल्लामा धर्ना दिने छ। भदौ २१ गतेदेखि भने अवरोधात्मक र विरोध प्रदर्शनसहित कडा आन्दोलन थालिने महासंघले चेतावनी दिएको छ।