नेपालमा कोरोना संक्रमणबाट मंगलबार बिहानै चार जनाको मृत्यु

काठमाडौंः नेपालमा कोरोना भाइरस संक्रमणबाट मंगलबार चार जनाको मृत्यु भएको छ । मोरङको विराटनगरस्थित नोबेल मेडिकल कलेजमा दुई, सुनसरीमा र नवलपरासीमा एक–एक जनाको मृत्यु भएको हो ।

विराटनगरस्थित नोबेल मेडिकल कलेजमा उपचाररत दुई संक्रमित पुरूषको आज बिहान मृत्यु भएको हो । मृत्यु हुनेमा रतुवामाई नगरपालिका –८ का ४५ वर्षीय र कानेपोखरी गाउँपालिका–६ का ५० वर्षीय पुरुष रहेका छन् । कानेपोखरीका पुरूष ब्लड क्यान्सरबाट पीडित थिए भने रतुवामाईका पुरूषमा मधुमेहको पनि समस्या थियो ।

त्यस्तै धरानस्थित बीपी कोइराला स्वास्थ्य विज्ञान प्रतिष्ठानमा उपचरारत धरान–३ का ६४ वर्षीय पुरुषको पनि मंगलबार विहान मृत्यु भएको छ । उनी गत असोज १२ गते संक्रमण पुष्टि भएपछि अस्पताल भर्ना भएका थिए ।

उता चितवन मेडिकल कलेजमा उपचाररत कावासोती नगरपालिका ५ का ७७ वर्षीया वृद्धको पनि मंगलबार विहान मृत्यु भएको छ । योसँगै नेपालमा कोरोना संक्रमणवाट मृत्यु हुनेको संख्या ५५८ पुगेको छ ।