साउन महिनाभित्र राष्ट्रिय भेला आयोजना गर्ने कांग्रेस संस्थापनइतरको निर्णय

बैठकपछि सञ्चारकर्मीसँग कुरा गर्दै नेता मीन विश्वकर्मा ले बीपी स्मृति दिवस को अवसर पारेर साउन ६ गते राष्ट्रिय भेला आयोजना गर्ने सैद्धान्तिक सहमति भएको जानकारी दिए। उनले मौसम तथा अन्य व्यवस्थापकीय अवस्था हेरेर मिति केही तलमाथि हुन सक्ने भए पनि साउनभित्रै भेला सम्पन्न गर्ने सहमति भएको बताए।

विश्वकर्माका अनुसार बैठकमा १९ जना नेताहरूले धारणा राखेका थिए। अधिकांश नेताहरूले पार्टीभित्र देखिएको गुटगत दूरी अन्त्य गर्दै पार्टीको एकता, आपसी विश्वास र संगठनलाई बलियो बनाउने दिशामा अघि बढ्नुपर्ने आवश्यकता औंल्याएका थिए। आगामी महाधिवेशन, संगठन विस्तार र बदलिँदो राजनीतिक परिस्थितिमा कांग्रेसले खेल्नुपर्ने भूमिकाबारे पनि बैठकमा व्यापक छलफल भएको उनले बताए।

बैठकमा मुलुकको समसामयिक राजनीतिक अवस्था, सरकारको कामकारबाही, विपक्षी दलको भूमिका तथा कांग्रेसले जनतामाझ प्रभावकारी रूपमा प्रस्तुत हुन अपनाउनुपर्ने रणनीतिबारे पनि विचार आदानप्रदान भएको जनाइएको छ।

संस्थापनइतर समूहले राष्ट्रिय भेलामार्फत पार्टीभित्रका साझा धारणा निर्माण, कार्यकर्तालाई एकताबद्ध बनाउने तथा आगामी राजनीतिक कार्यदिशा तय गर्ने तयारी गरेको जनाएको छ। उक्त भेलामा देशभरबाट संस्थापनइतर पक्षका नेता तथा प्रतिनिधिहरूको सहभागिता रहने अपेक्षा गरिएको छ।