पशुपतिनाथ मन्दिर बिहान ३ बजेदेखि चारै ढोका खोलिने, सुरक्षा व्यवस्था कडा

काठमाडौं । हरितालिका तीजका अवसरमा पशुपतिनाथ मन्दिर सोमबार बिहान ३ बजेदेखि चारै ढोका खोलिने भएको छ। पशुपति क्षेत्र विकास कोषले तीजका दिन व्रतालु महिला तथा भक्तजनलाई सहज र सुरक्षित दर्शनको व्यवस्था मिलाएको जानकारी दिएको हो ।

कोषका अनुसार मन्दिरमा छुट्टाछुट्टै दर्शन मार्ग र लाइनको व्यवस्था गरिनेछ। भीड व्यवस्थापनका लागि मन्दिर परिसरमा आठ लाइन सञ्चालन गरिनेछ भने एकपटकमा आठ जनाले दर्शन गर्नसक्ने व्यवस्था हुनेछ।

तीजलाई व्यवस्थित बनाउन नेपाल प्रहरी, सशस्त्र प्रहरी र नगर प्रहरी परिचालन गरिनेछ। पाकेटमारी तथा अन्य गतिविधि नियन्त्रणका लागि सादा पोसाकमा प्रहरी खटाइनेछ।

पशुपति क्षेत्रमा मांस, मदिरा तथा लागू पदार्थको बिक्री–वितरण र सेवनमा रोक लगाइनेछ। साथै, कोषले दर्शनका लागि कुनै पनि प्रकारको पास आवश्यक नरहेको स्पष्ट पारेको छ।