पूर्वराजा ज्ञानेन्द्रको दसैं सन्देश : विपद् पीडितको पुनःस्थापनादेखि राष्ट्रिय स्वाभिमानसम्म जोड

काठमाण्डौँ । पूर्वराजा ज्ञानेन्द्र शाहले बडादसैंको शुभकामना सन्देशमार्फत राष्ट्रिय एकता, आत्मनिर्भरता र देशको समग्र अवस्था सुधार गर्न सबै पक्षलाई आह्वान गरेका छन् ।

शुक्रबार बिहान जारी सन्देशमा उनले विजया दशमीको अवसरमा स्वदेश तथा विदेशमा रहेका सम्पूर्ण नेपालीको सुख, शान्ति र समृद्धिको कामना गर्दै प्राकृतिक विपद्, राजनीतिक अस्थिरता र कमजोर आर्थिक–सामाजिक अवस्थाप्रति चिन्ता व्यक्त गरेका हुन् ।

भोटेकोशी र बूढीगण्डकी क्षेत्रमा आएको भीषण बाढी तथा अविरल वर्षाले ठूलो जनधनको क्षति पुर्‍याएको उल्लेख गर्दै शाहले विपद्बाट प्रभावित नागरिकको पीडालाई सम्बोधन गर्न पुनर्निर्माण र पुनःस्थापनाका कामलाई तीव्रता दिनुपर्ने बताएका छन् ।

उनका अनुसार क्षतिग्रस्त भौतिक संरचनाको शीघ्र पुनर्निर्माण र पीडितको तत्काल पुनःस्थापना सरकार तथा सम्बन्धित निकायको प्राथमिकतामा पर्नुपर्छ । बाह्य सहयोग लिँदा राष्ट्रिय स्वाभिमान र स्थानीय परम्पराको संरक्षणमा पनि ध्यान दिनुपर्ने उनले बताएका छन् ।

देशको राजनीतिक, संवैधानिक, न्यायिक, आर्थिक र प्रशासनिक क्षेत्रमा अन्योल रहेको उल्लेख गर्दै शाहले प्रजातान्त्रिक विधि–प्रक्रियालाई बलियो बनाउँदै अर्थतन्त्र उकास्न सबै पक्ष जिम्मेवार हुनुपर्नेमा जोड दिएका छन् ।

नयाँ पुस्ताले नेतृत्वदायी जिम्मेवारी लिएर मुलुकलाई आशावादी दिशामा अघि बढाउने विश्वास व्यक्त गर्दै उनले राष्ट्रिय एकता र आत्मनिर्भरतालाई केन्द्रमा राखेर अघि बढ्न आह्वान गरेका छन् ।

यस्तो छ शुभकामना सन्देशको पूर्णपाठः

प्यारा नेपाली दिदी बहिनी तथा दाजु भाइहरु,

सदा झैं यस बर्ष पनि नेपालको सनातनी परम्परा र संस्कृति अनुरुप सत्य, सदाचार तथा मर्यादाका निम्ति मनाइने बडा दशैं हामी नेपालीको घर आंगनमा आइपुगेको छ ।

विभिन्न आरोह अवरोहहरु देख्दै, भोग्दै, सहँदै अनि सम्हालिदै आएका हामी नेपालीहरु प्राकृतिक प्रकोपको दुःख र पीडा कै बिचमा पनि आफ्ना चाडपर्व, धर्म, संस्कृति तथा रितिरिवाज धान्नु पर्ने अवस्थामा उभिएका छौं ।

यो बर्षको बर्षादकाल पनि हाम्रा निम्ति सुखद रहेन। भदौ दश गते भोटेकोशीमा पसेको भिषण बाढीले बिभिन्न जिल्लाका नदी तटीय क्षेत्रमा र यही असोजमा परेको अविरल बर्षा तथा दशैंको मुखैमा आएको बुढीगण्डकी बाढीका कारण जनधनको अपार क्षति हामीले भोग्नु पर्‍यो ।

प्रकृतिका नियमहरु न्यायसंगत छन् तर भयानक पनि । त्यहाँ कुनै कमजोर, करुणा हुँदैन । कारण र परिणामहरु अलग गर्न सकिदैन र अनिवार्य छन् । प्रकृति आफैमा एक नियमित र नियामक शक्ति हो , यसको गति स्वभाविक हुन्छ ।

त्यही तात्यूक र तार्किक सत्यलाई स्वीकार गरेर हामीले प्रकृति नबिथोलिने गरी सन्तुलन र संरक्षणको नीति अबलम्बन गर्नु पर्दछ । यसबाट आउने दुःख, बाढा र पीडालाई न्यूनिकरण गर्न हामी सबैले पूर्व तयारी र सावधानीका साथ सही शक्ति र सद्बुद्धिको प्रयोग गर्न सक्नु पर्दछ ।

शोकलाई शक्तिमा र निराशालाई आशामा बदल्दै जीवनको यात्रा तय गर्नु पर्ने हाम्रो बाध्यता रहेको तथ्य सर्वविदित नै छ । जनताको पीडा नै सिङ्गो देश र राज्यको पनि साझा पीडा हो भन्ने मान्यताको जगमा उभिएको हाम्रो भूमिका आगामी दिनहरुमा पनि नेपाल र नेपालीको पक्षमा नै रही रहनेछ । 

क्षतिग्रस्त भएका भौतिक संरचनाहरुको पुननिर्माण तथा पीडित नागरिकहरुको शीघ्रातिशीघ्र यथोचित पुर्नस्थापनाको कार्यलाई प्रमुख प्राथमिकतामा राखेर काम गर्नु पर्ने अहिलेको आवश्यकता हो । तर यस किसिमको कार्यमा बाह्य सहयोग लिंदा देशको स्वाभिमान, स्थानीय परम्परा जोगिने गरि कूटनैतिक चार्तुयता अपनाउनु पर्ने हुन्छ । 

नेपाल केबल भूगोल मात्र होइन, यो हाम्रो साझा इतिहास, आस्था, संस्कृति, परम्परा अनि चिनारी पनि हो । देशको कठिन समयमा एक अर्कामा भाइचारा कायम राख्नु, एक क्षेत्रका नागरिकको पीडामा अर्को क्षेत्रका नागरिकले साथ दिनु र राष्ट्रिय हितलाई व्यक्तिगत स्वार्थ भन्दा माथि राख्नु नै साँचो देशभक्ति हुन्छ । 

यतिखेर हाम्रो देश किन अस्तव्यस्त स्थितिमा रहेकोछ । हाम्रो राजनीतिक, सम्बैधानिक, न्यायिक, आर्थिक, सामाजिक, प्रशासनिक एवं व्यवसायिक क्षेत्र अन्यौेल र अलमलको अवस्थामा किन देखिन्छ ।

हाम्रो राज्य प्रणालीलाई कसरी लाने, हाम्रा प्रजातान्त्रिक आधारलाई कसरी बलियो पार्ने, हाम्रो अर्थतन्त्रलाई के गरेर उकास्ने भन्ने सवाल यतिबेला किन उत्पन्न भएको छ ।

यी सबैलाई सच्याएर, मिलाएर, प्रजातान्त्रिक विधि प्रकृयालाई सुदृढ पार्दै विद्यमान विश्व परिवेश र भूराजनीतिको स्थितिमा हाम्रो राष्ट्रियता तथा मौलिक मुल्यलाई दृढ पार्नु जरुरी छ । जोश जाँगर बोकेर राज्य संचालनमा खडा भएको नवपुस्ताले देशवासीको मुहार हँसिलो रसिलो पार्छ भन्ने अभिलाषा राखिएको छ । 

नेपालीको मनमा करुणा, समाजमा सद्भाव र देशभक्तिको भावना अझ बलियो बन्दै जावोस् । विभाजित होइन, एकताबद्ध नेपाल, परनिर्भर होइन आत्मनिर्भर नेपाल, कमजोर होइन सबल र सक्षम नेपाल निर्माण गर्ने सोच हामी सबैमा जागृत होस् । 

असत्य माथि सत्यको अनि आशुर्य शक्ति माथि दैवी शक्तिको बिजयको उल्लासको रुपमा मनाईने दशैंका अवसरमा शक्तिकी प्रतिक श्री नवदुर्गा भवानीले हामीलाई सत्य, न्याय र शक्तिको मार्गमा हिड्ने सत्बुद्धि प्रदान गरुन् ।
जय नेपाल !  सम्बाद सचिबालय
  निर्मल निवास