“चुनाव हात्तीको देखाउने दाँत मात्रै हो,” – डा. भट्टराई

काठमाण्डौंः जनता समाजवादी पार्टी (जसपा) नेपालको संघीय परिषद्का अध्यक्ष डा. बाबुराम भट्टराईले प्रधानमन्त्री केपी शर्मा ओली अहिलेसम्मकै ठूलो तानाशाह भएको आरोप लगाएका छन् ।

कैलालीको टीकापुरमा बुधबार आयोजित सरकाविरुद्धको विरोध सभालाई सम्बोधन गर्दै पूर्वप्रधानमन्त्रीसमेत रहेका डा. भट्टराईले प्रतिनिधि सभा विघटन गरेर ओली तानाशाहीका रुपमा उदाएको बताए ।

“पूर्वराजा विरेन्द्र र ज्ञानेन्द्र पनि यति धेरै तानाशाही थिएनन्,” उनले भने, ओलीले अदालत, सेना, प्रहरीलगायतमा आफ्ना मान्छे भर्ती गरेर ‘सेटिङ’ मिलाएका छन् । अदालतमा १५ वर्षसम्म ओलीका मान्छे रहने गरि अहिले नै ‘सेटिङ’ भइसकेको छ ।”

उनले प्रधानमन्त्री ओलीले वैशाखमा निर्वाचन गराउनै नचाहेको दाबीसमेत गरे । “चुनाव हात्तीको देखाउने दाँत मात्रै हो,” डा. भट्टराईले भने, “चुनाव हुन्छ भन्ने भ्रममा हामी कोही पर्नु हुँदैन ।”

भट्टराईले २०७२ भदौ ७ गते टीकापुरमा भएको घटना राजनीतिक घटना भएको दाबी गर्दै टीकापुर घटनालाई राजनीतिक घटनाकै रुपमा सम्बोधन गरिनुपर्नेमा जोड दिए । उनले कैलाली क्षेत्र नं. १ बाट विजयी सांसद रेशमलाल चौधरीलाई सरकारले राजनीतिक पूर्वाग्रहकै आधारमा जेलमा राखेको आरोपसमेत लगाए ।