काठमाण्डौंः वीरगञ्जमा उपचाररत थप ३ जना कोरोना संक्रमितको आज मृत्यु भएको छ । बीरगंज स्थित नारायणी अस्पतालमा उपचाररत ६५ वर्षीया महिलाको कोरोना सङ्क्रमणका कारण आज बिहान ८.१० बजे मृत्यु भएको छ ।
बीरगंज महानगरपालिका वडा नम्बर २ छपकैया निवासी ६५ वर्षीया महिलालाई स्वास्थ्यमा समस्या भएपछि गत वैशाख १६ गते अस्पताल भर्ना गरिएको थियो ।
महिलाको वैशाख १७ गते पिसीआर परीक्षण गर्दा कोरोना संक्रमण पुष्टि भएको थियो । उनमा गम्भीर किसिमको निमोनिया देखिएको र निमोनियाका कारण दुवै फोक्सोमा समस्या भएपछि श्वासप्रश्वासमा अवरोध हुँदा उनको उपचारको क्रममा मृत्यु भएको नारायणी अस्पतालका कोभिड संयोजक डाक्टर सरोज रोशन दासले जानकारी दिनुभयो ।
यसैगरी गएराति नारायणी अस्पतालमा उपचाररत ४० वर्षीय पुरुषको मृत्यु भएको छ । कोरोना संक्रमित भई वैशाख १६ गते अस्पताल भर्ना भएका उनको उपचारको क्रममा गएराति मृत्यु भएको डाक्टर दासले बताउनुभयो ।
मृतक पुरुषको पनि उच्च निमोनियाको कारण श्वास प्रश्वासमा समस्या भएपछि मृत्यु भएको नारायणी अस्पतालका कोभिड संयोजक डाक्टर दासले बताउनुभयो । यसैगरी गएराति नै वीरगञ्जस्थित नारायणी वयोधा अस्पतालमा उपचाररत बीरगंज महानगरपालिका वडा नम्बर १६ निवासी ७० वर्षीय वृद्धको मृत्यु भएको छ ।
जिल्ला प्रशासन कार्यालय पर्साका कोभिड फोकल पर्सन विनय कुमार श्रीवास्तवले उपचारको क्रममा वृद्धको गएराति साढे ८ बजे मृत्यु भएको जानकारी दिनुभयो ।
गएराति र आज बिहान थप ३ जनाको मृत्यु भएसँगै बीरगंजमा वैशाख यता कोरोना सङ्क्रमणबाट मृत्यु हुनेको सङ्ख्या ३९ पुगेको छ । मृत्यु भएकामध्ये वीरगञ्जको नारायणी अस्पतालमा ३० जनाको, नारायणी बयोधा अस्पतालमा ५ जना, नेशनल मेडिकल कलेज शिक्षण अस्पतालद्वारा सञ्चालित अस्थायी कोभिड अस्पतालमा ३ जना र गण्डक अस्पतालमा १ जना उपचाररत संक्रमितको मृत्यु भएको प्रवक्ता श्रीबास्तबले जानकारी दिनुभयो ।
मृतक मध्ये २८ जना पर्साका ७ जना बाराका २ जना सर्लाहीका १ जना रौतहटका र १ जना भारतीय नागरिक रहेको श्रीवास्तवले बताउनुभयो । यसैविच बीरगंज स्थित नारायणी अस्पतालमा गरिएको पछिल्लो पिसीआर परीक्षणको क्रममा आज बिहान थप १ सय ९० जनालाई कोरोना संक्रमण पुष्टि भएको छ ।
२ सय ८८ जनाको पिसीआर परिक्षण गरिएकोमा १ सय ९० जनामा कोरोना संक्रमण पुष्टि भएको नारायणी अस्पतालका कोभिड संयोजक डाक्टर सरोज रोशन दासले जानकारी दिनुभयो । संक्रमण पुष्टि हुनेमा १३३ जना पुरुष र ५७ जना महिला रहेका छन् ।
संक्रमित मध्ये १३३ जना पर्सा जिल्लाको रहेका छन् भने बाराका ४१ जना, रौतहटका ५ जना, नेपालगन्ज, सप्तरी, महोत्तरी, धनुषाका १/१ जनामा कोरोना संक्रमण पुष्टि भएको डाक्टर दासले बताउनुभयो ।
संक्रमितको उमेर समूह ५ बर्ष देखी ७० बर्षसम्म रहेको र संक्रमितको सिटी भ्यालु १६ देखी ३५ दशमलव ५ सम्म रहेको नारायणी अस्पतालका कोभिड संयोजक डाक्टर दासले जानकारी दिनुभयो ।
युग खबर
२०७८ बैसाख २२, बुधबार
प्रतिक्रिया