नेकपा एमाले फुट्यो, माधवकुमार नेपालको नेतृत्वमा नेकपा एमाले समाजवादी नामको नयाँ दल दर्ता

काठमाडौंः संघीय संसदको सबैभन्दा ठूलो दल नेकपा एमाले अन्ततः विभाजन भएको छ ।

दल विभाजनका लागि सहज हुने गरी नयाँ अध्यादेश जारी भएकै दिन बुधबार वरिष्ठ नेता माधवकुमार नेपालको नेतृत्वमा नेकपा एमाले समाजवादी नामक दल दर्ता भएको हो । दल दर्ताका लागि नेपालसहितका नेताहरु निर्वाचन आयोग पुग्नुभएको थियो ।

निवेदनमा पार्टीको चुनाव चिह्न भने टुंगो लाग्न सकेको छैन । ‘खुला किताब’ प्रस्ताव गरिए पनि उन्नत लोकतान्त्रिक पार्टीको चुनाव चिन्ह ‘छड्के परेको किताब’सँग मिल्दो जुल्दो हुने भएकाले टुंगो नलागेको हो ।

एमाले अध्यक्ष केपी शर्मा ओलीसँगको अन्तरसंघर्ष चर्किँदै गएपछि अन्ततः नेपालसहितका नेताहरुले विभाजनको बाटो रोजेका हुन् ।

नयाँ दलमा एमालेका दोस्रो तहका नेताहरु जान अस्वीकार गरेका छन् । नेपाल समूहमा रहेका उपाध्यक्ष भीम रावल, अष्टलक्ष्मी शाक्य, बामदेव गौतम, युवराज ज्ञवाली, उपमहासचिव घनश्याम भूसाल, सचिव योगेश भट्टराई, गोकर्ण विष्ट, भीम आचार्यसहितका नेताहरुले साथ छाडेका छन् ।