कांग्रेस केन्द्रीय समिति बैठक : पौडेल पक्षले बहिष्कार गर्ने

काठमाडौं । नेपाली कांग्रेसका वरिष्ठ नेता रामचन्द्र पौडेल समूहले केन्द्रीय कार्यसमिति बैठक बहिष्कार गर्ने निर्णय गरेको छ।

सभापति शेरबहादुर देउवासँग पटक–पटक भएको वार्तामा नविसंघमा महामन्त्री थप गर्ने र तरुण दलको नेतृत्व दिने विषयमा सहमति नजुटेपछि शुक्रबार बोलाएको बैठक पौडेल पक्षले बहिष्कार गर्ने भएको हो।
सहमति जुटन नसकेका कारण बैठकमा सहभागी नहुने निर्णय गरेको पौडेल समूहका नेता गुरु घिमिरेले बताएका छन। कार्यसमिति बैठकमा सहभागिताबारे निर्णय गर्न शुक्रबार बिहान नेता प्रकाशमान सिंहको निवास चाक्सीबारीमा सो समूहको बैठक बसेको थियो। नेता घिमिरेले भने, ‘सभापति हाम्रा मागमा सहमत नभएपछि हामीले आजको बैठकमा सहभागी नहुने निर्णय गरेका छौं।’
बैठकमा वरिष्ठ नेता रामचन्द्र पौडेल, प्रकाशमान सिंह लगायतको उपस्थिति थियो भने पौडेल समूहसँग जोडिँदै आएका अर्का नेता कृष्ण सिटौला भने सहभागी थिएनन्।

मंसिर २६ गते बसेको कार्यसमिति बैठक पनि पौडेल समूहले बहिष्कार गरेकाले मुख्य विषयमा प्रवेश नै नगरी स्थगित गरिएको थियो। त्यसयता कार्यसमितिको मिति तय हुँदै स्थगित गरिँदै आएको छ। पुस २ र ४ गते राखिएको बैठक बस्दै नबसी स्थगित गरिएको थियो भने त्यसपछि पौडेल समूहसँग निर्णायक वार्ता गर्ने भन्दै शुक्रबार कार्यसमिति बैठक बस्ने तय गरिएको थियो।