गणेश लामाको सम्पत्ति जफतको निर्णय

काठमाडौं । नेपाली कांग्रेसका नेताको रुपमा समेत चिनिएका काभ्रेका गणेश लामालाई विशेष अदालतले सम्पत्ति शुद्धीकरणसम्बन्धी मुद्दामा दोषी ठहर गर्दै एक वर्ष कैद र एक करोड बिगो बराबरको सम्पति जफत गर्ने फैसला सुनाएको छ ।

विशेष अदालतका अध्यक्ष बाबुराम रेग्मी, न्यायाधीशहरु द्वारिकामान जोशी र रत्नबहादुर बागचन्दको इजलाशले बुधबार लामालाई कैद र एक करोड ४० लाख ५० हजार सम्पति बराबरको बिगो जफत् गर्ने फैसला सुनाएको हो .

लामा गत निर्वाचनमा नेपाली काँग्रेसबाट काभ्रे प्रदेशसभा क्षेत्र नम्बर १ को ‘ख’का उम्मेदवार बनेका थिए । विजय गच्छदारको पाटीृमा रहेका उनी गच्छदार कांग्रेसमा पार्टीलाई नै बिलय गराएपछि लामा पनि कांग्रेसमा गएका थिए । कांग्रेसमा जाने वितिक्कै गच्छारको सिफारिसमा उनलाई उम्मेदवार बनाइएको थियो ।

लामाले आपराधिक गतिविधिबाट २७ करोड एक लाख सम्पति जोडेको अभियोगमा सम्पत्ति शुद्धीकरण अनुसन्धान विभागले मुद्दा दायर गरेको थियो प्रहरीको केन्द्रीय अनुसन्धान ब्युरो (सीआईबी)ले अनुसन्धान गरेर २०७० साल जेठ ५ गते लामासहित पाँच जना विरुद्ध सम्पत्ति शुद्धीकरण अनुसन्धान विभागलाई उपलब्ध गराएको थियो । विभागले सोहीअनुसार विशेष अदालतमा मुद्दा दायर गरेको थियो ।

लामा बाहेक पाल्साङ लामा, रञ्जु लामा, विनोद लामा, राकेश लामा र लक्ष्मी लामालाई अदालतले सफाइ दिएको छ । लामाको नाममा काठमाडौँ, भक्तपुर र ललितपुरमा २०५ रोपनी जग्गासहित रु २७ करोड एक लाख नगद अवैध रहेको उल्लेख गर्दै मुद्दा दायर गरिएको थियो । लामा हाल हातहतियार मुद्दामा डिल्लीबजार कारागारमा छन् । अदालतको निर्णय भएकाले उनकोपार्टीले उनका विषयमा मुख खालेको छैन ।