राष्ट्रिय पशुपंक्षी अनुसन्धान केन्द्र सार्न लागेकोमा सांसद राउतको आपत्ति

काठमाडौंः जनमत पार्टीका अध्यक्ष डा. चन्द्रकान्त राउतले राष्ट्रिय पशुपंक्षी अनुसन्धान केन्द्र सप्तरीबाट सार्ने प्रयास भइरहेको भन्दै आपत्ति जनाउनुभएको छ ।

आइतबार प्रतिनिधि सभाको बैठकमा बोल्नुुहुँदै सांसद राउतले कृषि तथा पशुपंक्षी विकासमन्त्री ज्वालाकुमारी साहले आफ्नो गृह जिल्लामा केन्द्र सार्न लागेको भन्दै आपत्ति जनाउनुभएको हो ।

उहाँले मन्त्री फेरिएपिच्छे संस्थाहरु सारिँदा विकास निर्माणले गति नलिने बताउनुभयो । राउतले  सरकार संसदप्रति उत्तरदायी छ की छैन भन्दै प्रश्नसमेत गर्नुभयो ।

सांसद राउतले संसदमा सांसदहरुले उठाएका कुराहरु टिपेर त्यसबारेमा के कति कामहरु भइरहेका छन् भन्नेबारेमा सरकारले संयन्त्र निर्माण गरेर जानकारी नगराउने हो भने सांसदहरुले संसदमा बोलिरहनुको अर्थ नरहेको बताउनुभयो । सरकारले मल ल्याउँदा पनि कालोबजारीका कारण किसानले समयमै मल नपाइरहेको भन्दै सरकारले कालोबजारीमा नियन्त्रण गर्न आवश्यक रहेको धारणा उहाँले औंल्याउनुभयो ।

‘‘यहाँ कुनैकुरा बोल्दा अर्थ राख्छ की राख्दैन, हामी सुन्छौँ की भित्तालाई खालि सुनाइरहेका छौँ । कुर्सीलाई सुनाइरहेका छौँ । सरकार यो संसदप्रति उत्तरदायी छ, जिम्मेवार छ यो कुरामा सभामुखज्युबाट आश्वस्त हुन चाहन्छु, काग कराउँदै गर्छ, पिनास सुक्दै जान्छ जस्तो भयो । आज पनि मलखादको विषय आधा दर्जन मान्यज्युले उठाउनु भयो । हामी पटकपटक उठाउँदै आएका छौँ तर सरकारले यस विषयमा के कति कदम चाल्यो त्यो संसदमा आउनुपर्छ, नत्र राम्रो भाषण गर्नुभयो भन्नेमा मात्रै सिमित हुन्छ, संसदमा उठेका कुराहरु टिपेर त्यसबारेमा जानकारी गराउने संयन्त्र नै खडा होस् ।,’’ सांसद राउतले भन्नुभयो, ‘‘आगामी बैठक सुरु गर्नुअघि त्यो विषयमा कति कारबाही भयो ? त्यसबारेमा जानकारी होस् । किसानले मलखाद पाइरहेका छैनन्, कालाबजारीलाई प्रहरी प्रशासन र नेपाल सरकारले नियन्त्रण गर्नुपर्छ, यो भन्दा अघि राष्ट्रिय पशुपंक्षी अनुसन्धान केन्द्र सप्तरीमा राखिएको थियो, अहिले सुन्दैछु, कृषिमन्त्रीज्युले आफ्नो निर्वाचन क्षेत्रतिर अरु जिल्लामा सार्ने प्रयत्न गर्दै हुनुहन्छ, यस्तो प्रवृत्ति दोहोरियो भने विकास हुन सक्दैन ।’’

सांसद राउतले नागरिकता प्रदान गर्ने प्रतिवद्धतामा सरकार कुन चरणमा छ भन्दै प्रश्न गर्नुभयो ।